|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 323 Hüküm no: 439 Orijinal metin no: [245-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed b. İlyas’ın evini Istabl-ı âmire Mescidi Evkâfı’na bey‘ bi’l-istiğlâl yoluyla sattığı
Havâss-ı aliyye kazâsına tâbi‘ Hasköy mahallâtından el-Hâc Şaban mahallesi sâkinlerinden Ahmed b. İlyas nâm kimesne şer‘-i şerîf-i lâzımü’t-tevkīrde Istabl-ı âmire Mescidi Evkāfı’na hâlen mütevellî olan Mustafa Efendi mahzarında ikrâr ve i‘tirâf edip mahalle-i mezbûr[e]de silk-i mülkümde münselik olan bir bâb tahtânî odayı ve bir bâb fevkānî odayı ve bir bâb ıstablı ve kenîfi ve müşterek su kuyusunu müştemil olup bir tarafı ba‘zan Mustafa Çelebi mülkü ve ba‘zan Hatice Hâtun mülkü ve bir tarafı Sâime Hâtun mülkü ve iki tarafı tarîk-i âm ile mahdûd ve mümtâz olan mülkümü mezbûr mütevellî Mustafa Efendi’ye yüz elli riyâlî guruşa bey‘ eyledim ol dahi mâl-ı vakıf ile bi-tarîki’l-istiğlâl iştirâ edip kabz-ı semen ve teslîm-i mebî‘ eylediğimden sonra menzil-i mezbûru ba‘de’t-tahliyeti’ş-şer‘iyye mütevellî-i mezbûrdan beher sene bin altı yüz râyic fi’l-vakt akçeye istîcâr eyledim, mütevellî-i mezbûr Mustafa Efendi dahi îcâr ve teslîm eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe sene hamsîn ve elf.
Şuhûdü’l-hâl: es-Sâbıkūn
|