|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 323 Hüküm no: 440 Orijinal metin no: [245-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ticaret için Karadeniz seferine gidecek olan Hasan b. Veli’nin eşi ile kızına nafakalarını tayini ve beş aya kadar dönmezse eşinin boşanmış sayılacağı
Havâss-ı aliyye kazâsına tâbi‘ Hasköy mahallâtından Turşucu mahallesi sükkânından Hasan b. Veli nâm kimesne meclis-i şer‘de zevcesi Şirin Hâtun bt. Mehmed nâm kimesne mahzarında takrîr-i kelâm edip hâlen ben Karadeniz seferine ticâret niyeti ile gitmek murâd eyledim, işbu hâzır bi’l-meclis olan Şirin Hâtun’a ve sulbiye sagīr[e] kızım Âişe’ye nafaka ve kisveleri için yevmiye dörder akçe kendi mâlımdan sarf etmeğe ve istidâneye izin verdim, seferden geldikden sonra nafaka ve kisveleri için istidâneye izin verdiğim yevmî dörder akçeyi edâ ederim ve eğer sefer-i mezkûrda gıyâbım târih-i kitâbdan beş ayı tecâvüz ederse zevcem mezkûr[e] Şirin Hâtun bâyin talâk ile mutallaka olsun dedikde, mezkûr Şirin Hâtun dahi mukırr-ı mezkûrun vech-i meşrûh üzre vâki‘ olan ikrârını bi’l-muvâcehe tasdîk etmeğin hıfzan li’l-makāl bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min şehri Zilka‘de li sene hamsîn ve elf.
Şuhûdü’l-hâl: İbrahim Efendi el-İmâm bi-mahalle-i Turşucu, Mehmed Çelebi el-Müezzin bi-Câmi‘-i Turşucu, Ali b. Abdullah el-muhzır ve gayruhüm mine’l-hâzırîn
|