.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 325
Hüküm no: 442
Orijinal metin no: [246-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Çelebi b. Mehmed’in mülk evini Râbia Hâtun bt. Hasan’a sattığı

Medîne[-i] Ebî Eyyûbi’l-Ensârî -radiye anhü Rabbühi’l-Bârî- kazâsına tâbi‘ Hasköy mahallâtından Kiremitçi Ahmed Çelebi mahallesi sükkânından Ahmed Çelebi b. Mehmed nâm kimesne meclis-i şer‘-i şerîf-i râsihü’l-erkân ve mahfil-i münîf-i şâmihü’l-beyânda işbu hâfızet-i hâze’l-kitâb zevci Râbia Hâtun bt. Hasan nâm hâtun [mahzarında] bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Defterdâroğlu Mahmud Çelebi mülküne ve bir tarafı Belkıs Hâtun mülküne ve bir tarafı el-Hâc Mustafa mülküne ve bir tarafı tarîk-i âm ile mahdûd [ve] mümtâz olan mülk-i mevrûsumu bi-cümleti’t-tevâbi‘ ve’l-levâhık mezbûre Râbia Hâtun’a râyic fi’l-vakt kırk bin akçeye bey‘-i bâtt-ı sahîh-i şer‘î ile [bey‘] edip teslîm-i mebî‘ [ve] kabz-ı semen eyledim dedikde, mezbûre Râbia Hâtun mukırr-ı mezkûrun vech-i muharrer üzre vâki‘ olan ikrârını bi’l-müşâfehe tahkīk ve bi’l-muvâcehe tasdîk etmeğin hâzihi’l-vesîkatü’l-enîka bi’t-taleb ketb olundu. Tahrîren fî gurreti Zilhicceti’l-harâm sene 1050.


Şuhûdü’l-hâl: Mehmed Efendi b. Mustafa el-İmâm, Mehmed Halîfe b. İbrahim el-Müezzin, fahrü’l-akrân Osman Ağa, Mahmud Çelebi b. Mehmed serrâc-ı sultânî, Ahmed Çelebi [b.] Mustafa el-Hammâmî, Osman Bey serrâc-ı sultânî, Rıdvan Bey b. Abdullah, el-Hâc Mustafa b. ( ), Ali Beşe b. Mehmed, Mehmed Çelebi b. Bilal, Mustafa Çelebi b. Abdullah, Ali b. Abdullah, el-muhzır ve gayruhüm mine’l-huzzâr