|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 326 Hüküm no: 444 Orijinal metin no: [247-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Marula’nın kocasını darp ederek ölümüne sebep olduğu iddiasıyla Mehmed Beşe aleyhine açtığı davada iddiasını ispat edemediği
Havâss-ı aliyye kazâsına tâbi‘ Hasköy mahallâtından Pîrî Paşa mahallesi sâkinelerinden Marula nâm zimmîyye meclis-i şer‘-i şerîf-i lâzımü’t-tevkīr[de] Mahmiye-i Kostantıniyye mahallâtından Bâb-ı Edirne kurbunda Keçeci Pîrî mahallesi sâkinlerinden Mehmed Beşe b. Mustafa nâm kimesne mahzarında takrîr-i kelâm ve ta‘bîr ani’l-merâm edip bundan akdem mürd olan zevcim Velande? v. Niko nâm zimmîyi bi-gayr-ı vech darb edip ol darbdan ifâkat bulmayıp mürd olmuşdur, zevcim mezbûr Velande?’nin helâkine merkūm Mehmed Beşe sebeb olmuşdur suâl olunup ihkāk-ı hak olunmak matlûbumdur dedikde, gıbbe’s-suâl mezbûr Mehmed Beşe münkir olup merkūme Marula nâm zimmîyyenin sıdk-ı da‘vâsına mutâbık beyyine taleb olundukda ityân-ı beyyineden izhâr-ı acz etmeğin mezbûr Mehmed Beşe’ye yemîn teklîf olundukda ol dahi alâ vefki’s-suâl yemîn billâhi’l-aliyyi’l-azîm etmeğin hâzihi’l-vesîka gıbbe’t-taleb ketb olundu. Tahrîren fî evâhiri Zilhicce sene 1050.
Şuhûdü’l-hâl: es-Seyyid Mehmed b. es-Seyyid Mahmud, fahrü akrânihî Mehmed Çavuş b. Ali, Bayram Çelebi b. Ali, İbrahim b. Hasan, Ali b. Abdullah el-muhzır, Kiraleni? v. Mihal?, Kirako? v. Yani, Yorgi v. Kiraki?, Estvares? v. Dimitri ve gayruhüm
|