.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 326
Hüküm no: 445
Orijinal metin no: [247-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vakıf arsanın mütevellî Ahmed Efendi tarafından kendi parasıyla binâ yapmak üzere Gülbeği v. Bayik’e kiraya verildiği

Havâss-ı aliyye kazâsına [tâbi‘] Hasköy mahallâtından Turşucu mahallesi sâkinlerinden Gülbeği v. Bayik nâm zimmî meclis-i şer‘-i şerîf-i lâzımü’t-tevkīrde yine mezbûr Hasköy’de el-Hâc Şaban Vakfı’na mütevellî olan Ahmed Efendi nâm mütevellînin hâtemi ile mahtûm ve imzâsı ile mümzâ sene tis‘în ve selâsin ve elf Recebü’l-müreccebinin târihi ile müverrah tezkire ibrâz edip mazmûnunda vakf-ı mezbûr evkāfından bir kıt‘a arz-ı hâliye ki tûlü kırk dört zirâ‘ arzı on beş zirâ‘dır, bir tarafı ba‘zan tarîk-i hâssa ve ba‘zan yine vakf-ı mezbûr evkāfından yine mezbûr Gülbeği mutasarrıf olduğu mahzene ve bir tarafı Karakaş oğulları mülküne ve bir tarafı Ali Çelebi mülküne ve bir tarafı yine mezbûr Gülbeği mülküne müntehî olan mârrü’z-zikr arz-ı hâliyeyi mezbûr Gülbeği kendi mâlı [ile] binâ etmek için cânib-i vakfa üç bin akçe icâre-i mu‘accele verip ve beher sene yüz yirmişer akçe mukāta‘a takdîr eyleyip tasarrufu için yedine izin temessükü verilmişdir, mâdem ki sâl be sâl cânib-i vakfa yüz yirmişer akçe edâ ve teslîm eyledikde âhardan bir kimesne mâni‘ olmaya deyû musattara olmağın hâzihi’l-vesîka bi’t-taleb ketb olundu. Tahrîren fî evâhiri Zilhicceti’l-harâm sene hamsîn ve elf.


Şuhûdü’l-hâl: Mehmed Efendi b. Mustafa el-İmâm, Mahmud Bey b. Mehmed serrâc, Mehmed b. İbrahim el-Müezzin, Himmet Beşe b. Pürkadem, Mustafa Beşe b. Abdullah, Osman Beşe b. Abdullah, Ahmed Çelebi b. Mustafa el-Hammâmî, Abdi Bey b. Şaban serrâc, Ali b. Abdullah el-muhzır ve gayruhüm mine’l-huzzâr