|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 328 Hüküm no: 447 Orijinal metin no: [248-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Hasan’ın boşandığı kocası Mustafa b. Osman’da mehir ve nafaka alacaklarından kalanını tahsil ederek zimmetini ibrâ ettiği
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkine Fâtıma bt. Hasan nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb sâbıkan zevci olan Mustafa b. Osman nâm kimesne mahzarında bi’t-tav‘i’s-sâf ikrâr ve takrîr-i kelâm edip bundan akdem mezbûr Mustafa beni tatlîk ettikde zimmetinde mehr-i müeccelimden iki yüz akçe hakkım ve iddet nafaka-i mu‘ayyenem bâkī kalmışidi, el-hâletü hâzihî meblağ-ı mezbûr iki yüz akçe hakkımı ve iddet nafaka-i mu‘ayyenemi mezbûr Mustafa yedinden bi’t-tamâm ve’l-kemâl ahz u kabz eyleyip zevciyyete müte‘allik olan cemî‘ de‘âvî ve mutâlebâtdan ve eymândan zimmetini ibrâ-i âm ile ibrâ ve ıskāt-ı tâm ile ıskāt eyledim dedikde mukırra-i merkūme[nin] ikrâr-ı meşrûhunu el-mukarru lehü’l-mezbûr Mustafa vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene ihdâ ve hamsîn ve elf.
Şuhûdü’l-hâl: Ali Dede b. Hüseyin, Osman b. Abdullah, Ali b. Abdullah ve gayruhüm mine’l-huzzâr
|