|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 329 Hüküm no: 450 Orijinal metin no: [249-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Aristos v. Yani’nin mülk evini Haydar Paşa Vakfı’na bey‘ bi’l-istiğlâl yoluyla sattığı
Havâss-ı aliyye kazâsına tâbi‘ Hasköy’de sâkin Aristos v. Yani nâm zimmî meclis-i şer‘-i hatîr-i lâzımü’t-tevkīrde Mahmiye-i İstanbul’da vâki‘ merhûm Haydar Paşa Vakfı’na bi’l-fi‘il mütevellî olan fahrü’l-akrân Receb Bey b. Abdülmennân mahzarında bi’t-tav‘i’s-sâf ikrâr ve takrîr-i kelâm eyleyip silk-i mülkümde münselik olup karye-i mezkûrede vâki‘ bir tarafı Mihal v. Yani mülkü ve bir tarafı ba‘zan Kokona nâm Nasrâniyye mülkü ve ba‘zan Arpa emîni mülkü ve bir tarafı sâhil-i bahr ve bir tarafı tarîk-i âm ile mahdûd ve mümtâz olan fevkānî ve tahtânî odaları ve mahzeni ve bir bi’r-i mâ’ı müştemil olan mülk menzilimi mütevellî-i merkūm Receb Bey’e üç yüz yetmiş beş riyâlî guruşa bey‘ edip ol dahi mâl-ı vakıf ile bi-tarîki’l-istiğlâl iştirâ edip kabz-ı semen ve teslîm-i mebî‘ eylediğimden sonra menzil-i mezbûru ba‘de’t-tahliyeti’ş-şer‘iyye yine târih-i kitâbdan üç sene tamâmına değin beher sene üç bin akçeye îcâr eyledim ol dahi vech-i mübeyyen üzre istîcâr eyledi dedikde mütevellî-i merkūm Receb Bey’in ikrâr-ı meşrûhunu el-mukarru lehü’l-mezbûr Aristos bi’l-muvâcehe tasdîk ve bi’l-müşâfehe [tahkīk] edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Muharremi’l-harâm li sene ihdâ ve hamsîn ve elf.
Şuhûdü’l-hâl: Mahmud Çelebi b. Abdurrahman er-Râcil, Ahmed Çelebi b. Ali, el-Hâc Fethullah b. Emrullah el-kadı, Mahmud b. Receb, Musa b. Mehmed, Ahmed İmâmzâde, Ahmed Efendi el-Müderris
|