.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 330
Hüküm no: 451
Orijinal metin no: [249-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Dimitri v. Rizo’nun içki bedelinden Kosta’daki alacağını talep ettiği ve ödenmesinin tenbih edildiği

Havâss-ı aliyye kazâsına tâbi‘ Hasköy’de sâkin meyhâneci tâ’ifesinden Dimitri v. Rizo nâm zimmî meclis-i şer‘-i hatîr-i lâzımü’t-tevkīr[d]e yine tâ’ife-i mezbûreden Kosta v. Miho? nâm zimmîyi ihzâr ve mahzarında üzerine takrîr-i da‘vâ edip mezbûr Kosta zimmetinde arak bahâsından iki bin yüz elli akçe hakkım olup meblağ-ı mezbûru zimmîler huzûrunda ikrâr dahi eylemişdir taleb eylediğimde vermede te‘allül eder suâl olunup alıverilmesin [250] taleb ederim dedikde gıbbe’s-suâl ve akībe’l-inkâr müdde‘î-i merkūm Dimitri’den takrîr-i da‘vâsını mübeyyin beyyine taleb olundukda karye-i mezbûre sükkânından Yani v. Kosta? ve İsterihos. v. Dimitri nâm zimmîler meclis-i şer‘a li ecli’ş-şehâde hâzırân olup gıbbe’l-istişhâd fi’l-hakīka müdde‘î-i mezbûrun merkūm Kosta’nın zimmetinde arak bahâsından iki bin yüz elli akçe deyni olduğunu bizim huzûrumuzda ikrâr eylemişdir, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın meblağ-ı mezbûrun edâsına tenbîh birle mâ hüve’l-vâki‘ gıbbe’t-taleb ketb olundu. Tahrîren fî evâili Saferi’l-hayr li sene ihdâ ve hamsîn ve elf.


Şuhûdü’l-hâl: Ali b. Abdullah, Kiryaki v. Yani, Yorgi v. Kiryaki ve gayruhüm mine’l-huzzâr