|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 330 Hüküm no: 452 Orijinal metin no: [250-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Halil Efendi b. Zülfikar ile kardeşi Sefer Bey’in mülk evlerini Şehid Mehmed Paşa’nın para vakfına bey‘ bi’l-istiğlâl yoluyla sattıkları
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin a‘lemü’l-ulemâ’i’l-mütebahhirîn efdalü’l-fudâlâ’i’l-müteverri‘în vârisü ulûmi’l-enbiyâ’i ve’l-mürselîn hüccetü’l-hakkı ale’l-halki ecma‘în Halil Efendi b. Zülfikar ve li ebeveyn karındaşı Sefer Bey meclis-i şer‘-i hatîr-i lâzımü’t-tevkīrde Mahmiye-i İstanbul’da vâki‘ merhûm Şehid Mehmed Paşa’nın nukūd evkāfına bi’l-fi‘il mütevellî olan Mustafa Çelebi b. Mahmud nâm kimesne mahzarında bi’t-tav‘i’s-sâf ikrâr ve takrîr-i kelâm eyleyip silk-i mülkümüzde münselik olup mahalle-i mezbûrede vâki‘ iki tarafı kendi bahçemiz ve iki tarafı tarîk-i âm ile mahdûd ve mümtâz olan iki bâb tahtânî odayı ve bir matbahı ve bir bi’r-i mâ’ı ve bir bâb fevkānî odayı ve iki bâb küçük odayı ve iki sofayı müştemil olup ale’l-iştirâki’s-seviy mutasarrıf olduğumuz mülk menzilimizi mütevellî-i merkūm Mustafa Çelebi’ye mâl-ı vakf-ı mezbûr ile iki yüz otuz ade[d] esedî guruşa ve iki yüz aded riyâlî guruşa bey‘ edip ol dahi bi-tarîki’l-istiğlâl iştirâ edip kabz-ı semen ve teslîm-i mebî‘ eylediğimizden sonra menzil-i mezbûru ba‘de’t-tahliyeti’ş-şer‘iyye yine târih-i kitâb şehri gurresinden sene-i kâmile gāyetine varınca mütevellî-i mezbûrdan üç bin iki yüz on akçeye istîcâr eyledik, ol dahi vech-i meşrûh üzre îcâr ve teslîm eyledi dedikde, gıbbe’t-tasdîk menzil-i mezbûrun derkine ve ücret-i lâzımesine mezbûr Sefer Bey tarafeynden emr-i kabûlü hâviye kefâletle kefîl oldukda mâ vaka‘a bi’t-taleb ketb olundu. Tahrîren fî evâili Rebî‘ilevvel sene ihdâ ve hamsîn ve elf.
Şuhûdü’l-hâl: [251] es-Seyyid Nesim Efendi b. es-Seyyid Mirza, Mustafa Ağa b. Ali üstâd-ı bahçe-i Tersâne, Mustafa Efendi b. Mehmed el-Hatîb, el-Hâc Ali Çelebi b. el-Hâc Hasan, Sefer Dede b. İsmail, Mehmed Bey b. Rüstem bevvâb-ı sultânî, İbrahim Çelebi b. İsmail, Ali Beşe b. Hasan ve gayruhüm mine’l-hâzırîn
|