.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 332
Hüküm no: 454
Orijinal metin no: [251-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Halil b. Şükrullah’ın boşadığı zevcesi Âişe bt. Ramazan’da kalan keten bezinin nısfını almasına hükmedildiği

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Halil b. Şükrullah nâm kimesne meclis-i şer‘-i hatîr-i lâzımü’t-tevkīr[d]e sâbıkan zevcesi olan Âişe bt. Ramazan nâm hâtunu ihzâr ve mahzarında üzerine takrîr-i da‘vâ edip mezbûre Âişe’yi tatlîk eylediğimde zimmetinde elli zirâ‘ keten bezi kalıp mârrü’z-zikr bezin ketenini ben kendi mâlım ile aldım, vermede te‘allül eder suâl olunup alıverilmesin taleb ederim dedikde, gıbbe’s-suâl ve akībe’l-inkâr müdde‘î-i merkūmdan takrîri da‘vâsını mübeyyin beyyine taleb olundukda udûl-i müslimînden olup mahalle-i mezbûre sükkânından Ahmed Efendi b. Abdi el-İmâm ve Osman b. (Abdullah?) nâm kimesneler meclis-i şer‘a li ecli’ş-şehâde hâzırân olup gıbbe’l-istişhâd fi’l-hakīka müdde‘î-i merkūm zevce-i mutallakası olan mezbûre Âişe’yi bizim huzûrumuzda tatlîk eyledikde zimmetimde elli zirâ‘ bez vardır, ketenini merkūm Halil almışdır deyû ikrâr eylemişdir, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın sâlifü’z-zikr elli zirâ‘ bezin nısfı merkūm Halil’e hüküm birle mâ hüve’l-vâki‘ bi’t-taleb ketb olundu. Tahrîren fî evâhiri Saferi’l-hayr li sene ihdâ ve hamsîn ve elf.


Şuhûdü’l-hâl: Ali Beşe b. Kenan, Şaban b. Mehmed, Ali b. Abdullah, Receb b. Zülfikar ve gayruhüm mine’l-hâzırîn