|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 332 Hüküm no: 456 Orijinal metin no: [252-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İstanbul’da susam yağı satan esnâfın perakende fiyatlarında, bakkallar ile aralarındaki farkın kaldırıldığı
Mahmiye-i Kostantıniyye’de şirugan işleten kimesnelerden kethüdâları Murad b. Dede ve yiğitbaşıları ve Süleyman b. Abdullah ve İlyas Çavuş b. Abdullah ve Mustafa Bey b. Abdullah ve Pîrî b. Mustafa ve Ali b. Hacı ve Ali b. Ahmed ve sâir cem‘-i kesîr ve cemm-i gafîr mahfil-i kazâya hâzırûn olup bizim işlediğimiz şiruganı bizden bakkāllar iştirâ ettikden sonra her vakıyyede ikişer akçe ziyâde ile bey‘ eyler, bu cihetden şehirde iki türlü narh cârî olmağla şehirde küllî ihtilâl olup min ba‘d biz dahi bakkāllar narhı üzre bey‘ edelim, şol şartla ki fırınlarımızda revgan eksik olmaya ve hâricden gelen şiruganı bakkāllar alıp vakıyyede iki akçe ziyâde ile bey‘ eyleyeler bu üslûb üzre olmağa kıbel-i şer‘-i şerîfden izin taleb ederiz dediklerinde, ahâlî-i merkūmdan istintâk olundukda husûs-ı mezbûr vech-i meşrûh üzre olmak her vechile enseb ve evlâ ve ecrâdır dediklerinde cümlesi yeksân narh üzre bey‘ edip hâlen cârî olan on altı akçe üzre vakıyyesin bey‘ etmeye izin ve icâzet verilip mâ vaka‘a vukū‘u üzre bi’t-taleb kayd olundu. Tahrîren fî evâsıtı Muharremi’l-harâm li sene ihdâ ve elf.
Şuhûdü’l-hâl: Mehmed Ağa b. Abdullah ser muhzırân, Ali b. Abdullah serbölük, Hacı b. Hüseyin, Ali b. Veli serbölük
|