|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 333 Hüküm no: 457 Orijinal metin no: [252-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ortak oldukları vakıf bostanı kardeşi Halil Efendi’nin Yahuda v. Avraham’a devrettiği ve Sefer Bey’in de kabul ettiği
Havâss-ı aliyye kazâsı muzâfâtından Pîrî Paşa mahallesinde sâkin Sefer Bey b. Zülfikar nâm bevvâb-ı sultânî meclis-i şer‘-i şerîf-i lâzımü’t-teşrîfde işbu bâ‘is-i hâze’s-sifr Yahuda v. Avraham [nâm] Yahudi mahzarında bi’t-tav‘i’s-sâf ikrâr ve takrîr-i kelâm eyleyip mahalle-i mezbûrede vâki‘ merhûm Pîr Mehmed Paşa Vakfı’ndan olup li ebeveyn karındaşım mefharü’l-kuzât Halil Efendi ile lede’l-ahâlî ve’l-cîrân ma‘lûmü’l-hudûd olup ale’l-iştirâki’s-seviy mutasarrıf olduğumuz bostandan vakf-ı merkūm odaları tarafından tûlen ( ) ve arzan ( ) bi-hesâb-ı şatrancî ( ) ve tarîk-i âm kapısı tarafından [253] tûlen ( ) zirâ‘ ve arzan ( ) zirâ‘ bi-hesâb-ı şatrancî zirâ‘ ki cem‘an ( ) bostan yerini ben âhar diyârda iken mûmâ-ileyh Halil Efendi kendi tarafından asâleten ve benim tarafımdan vekâleten bi’l-fi‘il vakf-ı mezbûra mütevellî olan Zuhûrî Efendi’nin izni ile merkūm Yahuda’ya iki yüz riyâlî guruş mukābelesinde ferâğ ve tefvîz edip hâlen vech-i merkūm üzre karındaşım mûmâ-ileyh Halil Efendi’nin mezbûr Yahuda’ya ferâğ ve tefvîzini ben dahi kabûl eyledim dedikde mukırr-ı merkūmun ikrâr-ı meşrûhun el-mukarru lehü’l-mezbûr Yahuda bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Saferi’l-hayr li sene ihdâ ve hamsîn ve elf.
Şuhûdü’l-hâl: Ahmed Çelebi b. Muslu el-Hammâmî, Mehmed Beşe b. Bilal, Ali Halîfe b. Mehmed, Yusuf b. Rıdvan, Abdünnebi b. Musa, Ebûbekir b. Mustafa, Ali b. Abdullah ve gayruhüm mine’l-hâzırîn
|