|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 336 Hüküm no: 463 Orijinal metin no: [255-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Bey b. Mustafa’nın mülk evini Hüseyin Bey’in yetim oğlu Hasan’ın vasîsine bey‘ bi’l-istiğlâl yoluyla sattığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin Mehmed Bey b. Mustafa nâm bevvâb-ı sultânî meclis-i şer‘-i şerîf-i lâzımü’t-teşrîfde yine mahalle-i mezbûrede sâkin iken vefât eden Hüseyin Bey b. Mehmed nâm müteveffânın sulbî sagīr oğlu Hasan’ın tesviye-i umûruna vasîyy-i muhtârı olan Muslu Çelebi b. Veli nâm kimesne mahzarında ikrâr ve takrîr-i kelâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd olan dört bâb fevkānî odayı ve bir matbahı ve bir bâb ahırı müştemil olan mülk menzilimi vasîyy-i mezbûr Muslu Çelebi’ye iki yüz yetmiş beş riyâlî guruşa bey‘ edip ol dahi mâl-ı yetîm ile bi-tarîki’l-istiğlâl iştirâ edip kabz-ı semen-i ma‘dûd ve teslîm-i mebî‘-i mahdûd eylediğimden sonra zikr olunan menzili ba‘de’t-tahliyeti’ş-şer‘iyye târih-i kitâb şehri gurresinden sene tamâmına varınca vasîyy-i mezbûr Muslu Çelebi’den iki bin yedi yüz elli akçeye istîcâr eyledim ol dahi vech-i mübeyyen üzre îcâr ve teslîm eyledi dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilevvel sene ihdâ ve hamsîn ve elf.
Şuhûdü’l-hâl: Ahmed Efendi b. Abdullah el-İmâm, Mahmud Çelebi b. Mehmed es-Serrâc, İsmail Çelebi b. Abdullah, Hasan Bey b. Mehmed, Ali Dede b. Hüseyin, Mustafa Çelebi b. Halil es-Serrâc, Abdi Bey b. Şaban, Ali b. Abdullah ve gayruhüm mine’l-hâzırîn
|