|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 338 Hüküm no: 467 Orijinal metin no: [257-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yasef v. İsak’a alınan borç karşılığı mumhâne satışı (bey‘ bi’l-istiğlâl)
Havâss-ı aliyye kazâsına tâbi‘ Hasköy’de sâkin mumcu tâ’ifesinden Rizo v. Apostol ve Harto ve Yorgi veledey Rizo nâm zimmîler meclis-i şer‘-i hatîr-i lâzımü’t-tevkīrde işbu bâ‘is-i hâze’s-sifr Yasef v. İsak nâm Yahudi mahzarında her biri ikrâr ve takrîr-i kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd olan mumhânemizi mezbûr Yasef’e tâmmü’l-vezn sahîhü’l-ayâr yüz elli riyâlî guruşa bey‘ edip ol dahi bi-tarîki’l-istiğlâl iştirâ edip kabz-ı semen-i ma‘dûd ve teslîm-i mebî‘-i mahdûd eylediğimizden sonra zikr olan mumhâneyi ba‘de’t-tahliyeti’ş-şer‘iyye yine târih-i kitâb şehri gurresinden sene tamâmına değin mezbûr Yasef’den bin sekiz yüz akçeye istîcâr eyledik, ol dahi vech-i mübeyyen üzre îcâr ve teslîm eyledi dedikde, gıbbe’t-tasdîki’l-vicâhî zikr olunan mumhânenin derkine ve ücret-i mu‘ayyenesine her biri âharın hissesine tarafeynden emr-i kabûlü hâviye kefâletle kefîl olduk dediklerinde mâ vaka‘a bi’t-taleb ketb olundu. Tahrîren fî evâili şehri Rebî‘ılâhir li sene ihdâ ve hamsîn ve elf.
Şuhûdü’l-hâl: Mahmud Çelebi b. Mehmed, Mustafa Ağa b. Ali üstâd, Mehmed Beşe b. Abdullah, Ali b. Abdullah ve gayruhüm mine’l-hâzırîn
|