.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 339
Hüküm no: 470
Orijinal metin no: [258-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kamer bt. Abdullah’ın muhtelif ev eşyasını kocası İlyas b. Turcihan’a hibe ettiği

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkine Kamer bt. Abdullah nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb zevci İlyas b. Turcihan mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olan bir beledî döşek ve bir yorgan ve bir beyaz velençe ve bir kebe ve bir kilim ve iki yastık ve bir tencere ve bir tas ve kırk zirâ‘ bezi zevcim mezbûr İlyas’a hibe-i sahîh-i şer‘î ile hibe ve temlîk ve teslîm edip ol dahi vech-i muharrer üzre meclis-i hibede eşyâ-i mezkûreyi ittihâb ve kabz ve tesellüm ve temellük eyledi ba‘de’l-yevm eşyâ-i mezkûre merkūm İlyas’ın mülk-i mevhûbudur, keyfemâ yeşâ ve yehtâr mutasarrıf olsun dedikde mukırra-i merkūmenin ikrâr-ı meşrûhunu el-mukarru lehü’l-mezbûr İlyas bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Cumâdelûlâ li sene ihdâ ve hamsîn ve elf.


Şuhûdü’l-hâl: Ahmed Efendi b. Abdi el-İmâm, Mehmed b. Ali, Ali b. Hüseyin, Mehmed b. Hasan, Hasan b. Ahmed