Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 577 Hüküm no: 1132 Orijinal metin no: [109b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Usta b. Abdülmüsteân’ın ölmeden malının üçte birini cüz tilâveti için vasiyet ettiği Mahrûse-i Üsküdar’a tâbi‘ Kadıköy nâm karyeden Mevlânâ Mehmed Halîfe b. Ramazan el-imâm ve Mümin Halîfe b. Pîr Veli nâm kimesneler meclis-i âlî-kadr ve mahfil-i me’âlî-sadra Dergâh-ı âlî yeniçerilerinden Mustafa Beşe b. el-merhûm Mehmed Bey nâm kimesneyi ihzâr ve mahzarında takrîr-i kelâm edip hâssa bahçelerden Kız Bahçesi’nde sâbıkan üstâd olan Murad Usta b. Abdülmüste‘ân nâm kimesne hâl-i hayâtında cümle mâlının sülüsünü eczâ-i şerîfe tilâveti için vakf edip vasiyyet etti ve eczâ-i şerîfenin kırâ’ati içinden bize şart edip mezkûr Mustafa Beşe’nin babası merkūm Mehmed Bey’i vasîyy-i muhtâr ve vakf-ı mersûme mütevellî nasb ettikden sonra merkūm Murad Usta fevt olup muhallefâtından sülüs mâlı cem‘an otuz bin akçe olup meblağ-ı mezkûru merkūm Mehmed Bey kabz edip nice yıl her sene vazîfemizi mezbûr Mehmed Bey’den alırdık mersûm Mehmed Bey fevt olup meblağ-ı mezkûr zimmetinde kalmışdır meşrûtumuz olduğu bâ‘isden muhallefâtından zikr olunan otuz bin akçeyi da‘vâ ederiz merkūm Mustafa Beşe’den suâl olunmasın taleb ederiz deyip merkūmdan suâl olundukda inkâr ile cevâb vericek müdde‘iyyân-ı mezbûrânın da‘vâlarına muvâfık beyyine taleb olundukda udûl-i müslimînden Mustafa Çelebi b. Ali es-silâhî ve hâssa sarrâclardan İbrahim Bey b. Abdullah ve Bâli Bey b. İbrahim nâm kimesneler li ecli’ş-şehâde meclis-i şer‘a hâzırûn olup merkūm Murad Usta minvâl-i mezbûr üzre vasiyyet edip fevt oldukdan sonra muhallefâtından zikr olunan otuz bin akçeyi müteveffâ-yı mezbûr Mehmed Bey alıp kabz eyledi ba‘de’l-kabz çok zamân ba‘zısın mu‘âmeleye verip ba‘zısın kendi de alıp ribhi bunlara veririz Mehmed Bey şu akçeyi getir yazam mı getir sicile kayd olunup cümlenizin ma‘lûmu olsun dedikde cümle akçe benim uhdemdedir ben vasîyy-i muhtârım zabt ederim yazmaya ne ihtiyâc bendedir der idi şâhidleriz şehâdet ederiz dediklerinde şehâdetleri hayyiz-i kabûlde vâki‘ olup ve mâ hüve’l-vâki‘ tahrîr olundu. Tahrîren fî evâsıtı Safer sene elf. Şuhûdü’l-hâl: Mustafa b. Ali, Ahmed Çelebi b. Sadi, Mustafa b. Mehmed, Sefer b. Abdullah, Musli b. Ali, Hasan b. Sâdık, Mehmed b. Behrâm, Hüseyin b. Behrâm, Şemseddin b. Sâdık ve gayruhüm