Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 579 Hüküm no: 1135 Orijinal metin no: [110a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Abdülmüsteân’ın, bir bölük odasını Hasan Halîfe b. Yusuf’a sattığı Mahrûse-i Üsküdar’da sâkin kıdvetü’l-mukarrebîn Dergâh-ı âlî müteferrikalarından Osman Ağa b. Abdülmu‘în tarafından bey‘-i âti’z-zikre Yahya Bey b. Hamzavî ve Hüseyin Çelebi b. Hasan şehâdetleriyle sâbitü’l-vekâle olan Hasan Halîfe b. Yusuf mahfil-i kazâda işbu sâhibü’l-kitâb bi’l-fi‘l silahdârlar kethüdâsı olan Yunus Kethüdâ tarafından tasdîk-i âti’z-zikre Şah Bey b. Abdullah ve Ali Beşe b. Mustafa şehâdetleriyle sâbitü’l-vekâle olan Ahmed Bey b. Abdullah mahzarında ikrâr ve takrîr-i merâm edip müvekkilim mûmâileyh Osman Ağa mahalle-i Hâcce Hâtun’da vâki‘ hudûdunun erba‘ası tarîk-i âmma müntehî olup bir bölük odayı altı yüz zîr-i zemîni ile ve bir odasıyla ve bir sofasıyla ve kapısıyla ve yine kapı kurbunda odasıyla ve eşcâr-ı müsmire ve gayrımüsmiresiyle ve kenîfi ile müvekkilim mûmâileyh Osman Ağa mezbûrun müvekkili müşârunileyh Yunus Kethüdâ’ya yüz bin nakd râyic fi’l-vakt akçeye bey‘-i bât ile bey‘ eyledi dedikde mukırr-ı mezbûrun ikrâr-ı meşrûhundan vekâleten mukarrun lehü’l-mezbûr Ahmed Bey dahi vekâleten vicâhen ve şifâhen tasdîk ve tahkīk edip vâki‘ hâl gıbbe’t-taleb ketb olundu. Şuhûdü’l-hâl: Ahmed Bey b. Abdullah, İbrahim Bey b. Halil Sipâhi, Ali Bey b. Şaban silâhcı, Rüstem Bey b. Abdullah silâhcı, Veli Bey b. Abdullah ve gayruhüm