Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 580 Hüküm no: 1136 Orijinal metin no: [110a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Yorgi’nin, Mehmed Ağa b. Abdülmu‘în’e sattığı bağı kiraladığı Mahrûse-i Üsküdar muzâfâtından Aynaros nâm karye sükkânından Apostol v. Yorgi nâm zimmî mahfil-i kazâda bi’l-fi‘l Rumeli Ağası kıdvetü’l-havâs ve’l-mukarrebîn Mehmed Ağa b. Abdülmu‘în tarafından husûs-ı âti’z-zikri tasdîka nehc-i şer‘-i celîl üzre vekâleti sâbite olan fahrü’l-akrân Müstedâm Bey b. Abdullah mahzarında ikrâr ve takrîr-i merâm edip karye-i mezbûrede vâki‘ merhûm Abdullah Ağa evkāfından olup elân mülkümde olan dört kıt‘a bağlarım ki Korucu Muslihiddin ve Hüsrev Ağa ve Cebeci Mahmud ve Marziye Hâtun ve Mahmud b. Abdullah nâm kimesneler bağları ve iki tarafı tarîk-i âmma müntehî mezkûr bağlarımı mûmâileyh ağa hazretlerine on beş bin akçeye bey‘ edip teslîm-i mebî‘ ve kabz-ı semen eyledikden sonra târih-i kitâbdan sene tamâmına geri mezbûr bağları bin beş yüz akçe icâreye kabûl eyledim dedikde mukırr-ı mezbûrun kelâmın mukarrun lehü’l-mezbûr vicâhen ve şifâhen tasdîk edip karye-i mezbûre sâkinlerinden olup dergâh-ı âli yeniçerilerinden Âma Hüseyin Beşe b. Abdullah nâm kimesne meblağ-ı mezbûre ve icâreye kefîl bi’l-mâl oldum dediği i‘tirâfı mezbûr Müstedâm Bey talebiyle ketb olundu. Şuhûdü’l-hâl: Hüsrev Ağa Müteferrika-i Dergâh-ı âlî, Mahmud Ağa b. Abdullah ser Kazancıyân-ı Hazret-i Ağa, Süleyman Bey b. Abdullah, Receb b. Abdullah, Ali b. Mehmed ez-zaîm, Hüseyin b. Abdullah, Mehmed b. Ahmed, İsa b. Abdullah er-râcil ve gayruhüm