Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 580 Hüküm no: 1138 Orijinal metin no: [110b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mehmed’in, Ekmekçi Hacı Selim’deki alacaklarını istemesi Mahmiye-i Galata’ya tâbi‘ Kasım Paşa’da vâki‘ el-Hâc Ahmed evkāfına hâlâ mütevellî olan Ahmed Çelebi b. Mehmed meclis-i âlî-kadre mahrûse-i Üsküdar’da sâkin Hacı Selim b. ( ) mahzarında da‘vâ edip merkūm Selim’e Kasım Paşa’da bir ekmek fırını ve bin akçe sermâye verdim ba‘dehû karz üç yüz akçe ve dükkân kirâsından üç yüz akçe ve yetmiş beşer akçeye dört buçuk kile simid verdim zikr olunan simid bahâsından üç yüz otuz yedi buçuk akçe cem‘an dokuz yüz otuz yedi buçuk akçe hakkım var iken firâr edip bunda buldum suâl olunmasın taleb ederim deyicek ba‘de’s-suâl merkūm Hacı Selim fi’l-vâki‘ sermâye bin akçe karzdan üç yüz akçe ve kirâdan üç yüz akçe deynim var ammâ simid almadım deyu inkâr edip gıbbe’l-inkâr müdde‘î-i merkūm Ahmed Çelebi’nin da‘vâsına muvâfık beyyine taleb olundukda udûl-i müslimînden Yusuf b. Abdullah ve Emrullah b. Muzaffer nâm kimesneler li ecli’ş-şehâde meclis-i şer‘a hâzırân olup merkūm Selim mezbûr Ahmed Çelebi’den dört buçuk kile simidi yetmiş beşere olduğunda biz hâzırlarız deyu şehâdet etdiklerinden sonra mezbûr Selim zikr olunan dört buçuk kile simid dükkânda kaldı deyicek merkūm Ahmed Çelebi simidi almadığına yemîn ettiği kayd-ı sicil olundu. Hurrire fî evâsıtı Safer sene elf. Şuhûdü’l-hâl: Himmet Subaşı, Receb b. Hüseyin, Mustafa b. Behrâm, Mehmed b. Mustafa, Şemseddin b. Sâdık, Sefer b. Abdullah, Mehmed b. Behrâm, Hüseyin b. Behrâm ve gayruhüm