Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 582 Hüküm no: 1142 Orijinal metin no: [111a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Maksud Çeribaşı’nın, ölen Sâlih’e emânet verdiği kısrağı beytülmal zabitinden istemesi Musul sancağı tevâbi‘inden Sincar nâm kasabadan Mahmud b. Maksud Çeribaşı nâm kimesne hammâl tâifesinden Mehmed b. Fakīro nâm kimesne mahzarından takrîr-i merâm edip mahrûse-i Üsküdar’da fevt olan Sâlih nâm kimesneye emânet bir siyah kısrak vermiş idim mezbûrun vâris-i ma‘rûfu olmamağın muhallefâtı beytülmâl zâbiti kabz edip mezbûr Hammâl Mehmed’e bey‘ eylemiş şer‘le hakkım taleb ederim dedikde gıbbe’l-inkâr ve’l-istişhâd udûl-i müslimînden Mevlânâ Ramazan b. Hüsameddin ve Hoca Nasreddin nâm kimesneler li ecli’ş-şehâde hâzırân olup fi’l-vâki‘ mezbûr Mahmud zikr olunan katırı fevt olan Sâlih’e emânet vermiş idi alıp zimmetinde kaldı bu husûsa şâhidleriz şehâdet dahi ederiz dediklerinde ba‘de’t-ta‘dîl şehâdetleri makbûle olup mezbûr katır merkūm Mahmud’a hükm olunup mâ vaka‘a bi’t-taleb kayd-ı sicil olundu. Şuhûdü’l-hâl: Mustafa b. Mehmed, Hüseyin b. Mustafa, Hasan b. Sâdık, Mehmed b. Habîb, Şemseddin b. Sâdık ve gayruhüm