Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 587 Hüküm no: 1151 Orijinal metin no: [112a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd’un ahırından çalınan öküzlerin Abdülgani’de bulunduğu (…) ihzâr ve bi’l-muvâcehe takrîr-i da‘vâ edip bundan akdem ahırım içinden bir çift kara sığır öküzüm zâyi‘ olmuş idi hâlâ zikr olunan çiftlik yerin mezbûr Abdülgani yedinde buldum şer‘le taleb ederim dedikde gıbbe’s-suâl mezbûr Gani ben bu öküzü mahrûse-i İstanbul’da vâki‘ Edirnekapısı’ndan aldım senin idiğini bilmezim deyu cevâb vermeğin merkūm Kurd’dan sıdk-ı mekāline beyyine taleb olundukda karye-i mezbûreden Topçu Cafer b. Osman ve Ahmed b. Hüseyin nâm kimesneler meclis-i şer‘a hâzırân olup fi’l-vâki‘ işbu mahzarda olan gök, kara sığır öküzü mezbûr Kurd’un mülküdür bu husûsa şâhidleriz şehâdet dahi ederiz dediklerinde ba‘de’t-ta‘dîl şehâdetleri hayyiz-i kabûlde vâki‘ oldukdan sonra mezkûr Kurd’dan zikr olunan öküzü bey‘ etmeyip kimesneye hibe dahi etmeyip ve bi’l-cümle vechen mine’l-vücûh mülkünden ihrâc etmediğine yemîn verildikden sonra mezbûr öküz merkūm Kurd’a hükm olunup mâ vaka‘a bi’t-taleb ketb olunup yed-i tâlibe verildiği müdebbir-i mâ-cerâ oldu. Şuhûdü’l-hâl: Kıdvetü’l-akrân Yahya Bey Korucubaşı, Korucu Hüsrev Bey b. Abdullah, Korucu Ali Beşe b. Abdullah, Mehmed Bey b. Abdullah er-râcil, Hüseyin b. Behrâm, Sefer b. Abdullah, Şemseddin b. Sâdık