Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 590 Hüküm no: 1158 Orijinal metin no: [112b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Ağa Vakfı’na ait bostanın mütevellî Mustafa b. İsmail tarafından işletilmesi Mahrûse-i Üsküdar -sâneha’llâhu’l-ani’l-bevâr- muzâfâtından karye-i İstavroz’da câmi‘-i şerîf ve câminin bostanlardan ve gayrıden evkāfı olan merhûm Abdullah Ağa evkāfına ber mûceb-i şart-ı vâkıf ebnâ-i utekā-i vâkıfdan mütevellî olan hâmil-i hâze’l-kitâb Mustafa b. İsmail meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâd hâzır oldukdan sonra takrîr-i kelâm edicek vâkıf-ı mezbûr gaferallâhü’l-meliki’l-gafûr hazretleri evkāf-ı mezbûreden câmi‘ kurbundan olan besâtin vakfiyesinde kıyye ettikden sonra şart edip buyurmuşlar ki besâtîn-i mezbûreyi utekā ve ebnâsından taleb eder kimesne olursa anlara verilip muhtasar her ne olursa sülüsânın utekā alıp sülüsü vakıf için zabt oluna deyu mukayyeddir ber mûceb-i şart-ı vâkıf bir tarafı fahrü’l-mevâlî üzerine efendisi olan Sunullah Çelebi Efendi bahçesine ve bir tarafı Bâli bostanına ve bir tarafı Çerkes Ali bostanına ve bir tarafı câmi‘ önünde olan dereye muttasıl olup ecnebî elinde olan bostanı ben hizmet edip şart-ı vâkıf ile âmil olurum deyicek vakfiye-i ma‘mûlün-bihâya nazar olundukda şart-ı vâkıf minvâl-i meşrûh üzre olup mezbûrun ebnâ-i utekādan olduğu mukarrer olıcak zikr olunan bostan mezbûr Mustafa’nın yedinde olmak lâzım ve evlâ fehm olunmağın bin senesinde vâki‘ olan Rebî‘ülevvel gurresinde tasarruf ettim kimesne mâni‘ olmaya ve bu temessük ketb olundu. Şuhûdü’l-hâl: Hasan b. Sâdık, Hüseyin b. Behrâm, Murad Halîfe b. Abdullah Derkenar: Oldur ki Mehmed b. Hüsreve yemîn eyledi Ali Bey sıhhatinde aldığına.