Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 592 Hüküm no: 1163 Orijinal metin no: [113a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hasan ile Musa b. İshak’ın, kölelerini kandırdığı iddiasıyla Kasım b. Abdullah’a dava açtıkları Mahrûse-i Galata hâricinde sâkin Müeyyedzâde mahallesinden el-Hâc Mustafa b. Hasan ve el-Hâc Musa b. İshak mahfil-i kazâda emîrü’l-ümerâi’l-kirâm Tiflis beylerbeyisi olan Cafer Paşa âdemlerinden Kasım b. Abdullah mahzarında da‘vâ edip bundan akdem mezbûr Kasım b. Rıdvan ve Cafer nâm kullarımız ayarttı şer‘le suâl olunmasın taleb ettim dediklerinde vâki‘ hâl mezbûr Kasım’dan suâl olundukda inkâr edip beyyine taleb olundukda Nurullah b. İbrahim ve İbrahim b. Ali ve Hüseyin b. Ali ve Gāzi b. Mehmed b. Abdullah nâm Müslümanlar li ecli’ş-şehâde meclis-i şer‘-i şerîfe hâzırûn olup paşa-yı müşârunileyh mahrûse-i mezbûreye tâbi‘ Yeniköy nâm karyede sâkin iken mezbûr Kasım zikr olunan Rıdvan’ı ve Cafer’i karye-i mezbûreye getirdi ba‘dehû mezbûrân el-Hâc Mustafa ve el-Hâc Musa gelip mezbûr kulları alıp gittiler karye-i mezbûreye getirdiğinde biz hâzırdık şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup ba‘dehû merkūm Cafer mersûm Kasım mahzarında da‘vâ edip mezbûr beni ayartmadı zamânında efendim el-Hâc Musa’nın dokuz yüz elli akçesini getirmiş idim mezbûra verdim şer‘le taleb ederim deyip mezbûr Kasım inkârıyla cevâb verip alâ vukū‘ihi kayd-ı sicil olundu. Târih-i mezbûr. Şuhûdü’l-hâl: Sâbikūn