Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 593 Hüküm no: 1167 Orijinal metin no: [113b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arab Mehmed’in, ölen Hacı Ahmed’in terekesini gasbettiği Mahmiye-i Üsküdar’da subaşı ve beytülmâl zâbiti olan Müstedâm Bey mahfil-i şer‘-i şerîfde Mehmed nâm Arab muvâcehesinde takrîr-i da‘vâ kılıp muhallefâtını veresesi olmamak ile beytülmâl için zabt eylediğim Hacı Ahmed nâm müteveffânın akçesin ve guruş var derlerdi zuhûr eylemedi mezbûr Mehmed Arab ben birâderiyim deyu kizb edip müteveffâ-yı mezbûr lâ-ya‘kil hasta yatar iken yanından gitmez yanında bekler imiş bu almışdır suâl eylen dedikde mezbûr Arab Mehmed’e suâl olundukda ne birâderiyim ne birâderi geçindim ne akçesin ne guruşun aldım ne yanımda akçem guruşum vardır deyip mezbûr subaşıdan da‘vâsına muvâfık beyyine taleb olundukda Müslümanlardan el-Hâc Ömer b. Selim ve el-Hâc Ali b. Halon ve el-Hâc Bedreddin b. el-Hâc Mehmed edâ-yı şehâdet edip mezbûr Mehmed Arab bir fakīrdir bir akçesi kendinin yokdur hâli bizden mestûr değildir lâkin müteveffâ-yı mezbûrun guruşları ve akçesi var idi ve hasta yatarken dahi var idi mezbûr Mehmed Arab birâderim der idi yanından gitmez idi sonra haber aldık birâderi ve akreb-i değil imiş ecnebî aslâ alâkası yok iken mezbûr hasta lâ-ya‘kil yatar iken yanında ne maslahatın var idi ki yanından gitmez idin i‘tikâdımız budur ki müteveffâ-yı mezbûrun guruşu akçesi mezbûr Mehmed Arab’dadır yoklansın görüksün dediklerinde mezbûr Mehmed Arab çabalayıp yoklanmaya rızâ vermemek istemek ile töhmet olunup yoklanıldıkda yüz elli akçe ile üç bütün ve bir yarım guruş çıktığın mâ vaka‘a bi’t-taleb terkîm olundu. Fi’l-yevmi’s-sâdis min şehri Rebî‘ilâhir sene elf. Şuhûdü’l-hâl: Mehmed b. Behrâm, Mehmed Bey b. Abdullah er-râcil, Mustafa b. Mehmed, Ahmed b. Davud Arab, Mustafa b. Yusuf