Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 599 Hüküm no: 1183 Orijinal metin no: [115a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musli Çelebi b. el-Hâc Veli’nin, babasından kalan bağları kardeşleriyle paylaşması Mahmiye-i Kostantıniyye’de vâki‘ Dâye Hâtun mahallesinde Musli Çelebi b. el-Hâc Veli nâm kimesne meclis-i âlî-kadr ve mahfil-i me’âlî-sadra mahrûse-i Üsküdar mahallâtından Evliyâ Hoca mahallesi sükkânından hemşîresi Muhsine Hâtun bt. el-Hâc Veli tarafından husûs-ı âti’z-zikri kabûl ve kabzı ikrâra ve tasdîka vekîl olup Ali Çelebi b. Mahmud ve Ali Bey b. Abdullah şehâdetleri ile vekâleti sâbite olan zevci işbu hâmil-i hâze’l-kitâb Mustafa Bey b. Abdullah mahzarında bi tav‘ ve’l-ihtiyâr i‘tirâf ve ikrâr edip mahrûse-i mezkûreye tâbi‘ Kadıköy nâm karye sınırında babamızdan irs-i şer‘î ile intikāl edip Eskibağ demekle ma‘rûf bağ ki bir tarafı Andriye ve bir tarafı Kara Çubuk ve tarafeyni tarîk-i âm ile mahdûddur anda vaz‘ ettiğim sınır taşından tarafeyni tarîk-i âmma muttasıl olan tarafını ki lede’l-ahâlî ma‘lûmdur verip bâkīsin ben aldım ve Beybağ demekle meşhûr bağ ki bir tarafı Mustafa Çelebi b. Ali ve bir tarafı Hürrem ve Tazıcı Mustafa Bey ve bir tarafı sâhili deryâ ve bir tarafı tarîk-i âm ile mahdûddur zikr olunan bağa ettiğim sınırdan merkūmân Hürrem ve Tazıcı Mustafa Bey tarafından cânibi ki lede’l-ahâlî ma‘lûmdur âna verip bâkīsin ben aldım ve Küçükbağ demekle ma‘rûf bağ ki bir tarafı el-Hâc Haydar ve bir tarafı vakıf bağ ve tarafeyni sâhili deryâ ile mahdûddur ânda vaz‘ ettiğim sınırı alâmetlerinden zikr olunan vakıf bağ ve el-Hâc Haydar tarafından cânibi ki lede’l-ahâlî ma‘lûmdur ki verip bâkīsin ben aldım ve’l-hâsıl üç kıt‘a bağdan hisseleri ba‘de’t-taksîm alıp kabz ettiler min-ba‘d husûs-ı mîrasa müte‘allik da‘vâsı kalmadı dedikde mukırr-ı mezbûrun kelâmını vekîl-i merkūm Cemîle ikrârında tasdîk ettikden sonra kayd-ı sicil olundu. Hurrire fî evâsıtı Rebî‘ülevvel sene elf. Şuhûdü’l-hâl: Ali Çelebi b. Mahmud, Mehmed b. Sefer, Ali Bey b. Abdullah İslâm, Resûl Efendi b. Mustafa, Ahmed Bey b. Abdullah, el-Hâc Ferhad b. Abdullah, Mehmed b. Behrâm, el-Hâc Haydar b. Abdullah, Mehmed b. Abdullah