Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 603 Hüküm no: 1191 Orijinal metin no: [116a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. İbrahim’in, ölen kardeşinin eşi Emine bt. Hızır’a açtığı ev davasının, evin Emine’nin parayla aldığının anlaşılmasıyla reddedildiği Sipâhi oğlanı zümresinden Mustafa b. İbrahim nâm kimesne mahfil-i kazâya Emine bt. Hızır nâm hâtunu ihzâr ve bi’l-muvâcehe takrîr-i da‘vâ edip mahrûse-i Üsküdar mahallâtından Gerede mahallesinde bundan akdem fevt olan karındaşım Üstâd Halil b. İbrahim’in mezkûre Emine zevcesi olmağla mahalle-i mezbûrede vâki‘ hudûdunun bir tarafı Mustafa b. Ali mülküne ve taraf-ı âharı Ayşe ve Fâtıma nâm hâtunlar mülklerine ve bir tarafı Mustafa b. Durak Hân mülküne ve bir tarafı Mehmed ve İbrahim nâm karındaşlar mülklerine muttasıl olup fevkānî bir evini altında ahırıyla ve bir mikdâr havlusu ile ve nısf kuyusu ve kenîfi müştemil olan menzilden şer‘le hakkım taleb ederim dedikde merkūme Emine’ye ne temessük ile taleb edersin deyu suâl olundukda dokuz yüz seksen dokuz Muharremü’l-harâmı’nın on yedinci günü târihiyle müverrah ve Sinan Efendi b. Cafer imzası ve hatmi ile mahtûm hüccet ibrâz edince nazar olundukda menzil-i mezbûr bundan akdem müteveffâ olan Arpacı Yusuf’un mülkü olup Kamer nâm sagīre kızına değip ba‘dehû zarûret-i deyn için merkūme Kamer’in kıbel-i şer‘-i şerîfden vasîsi olan Üstâd Halil [b.] Murad’a verip bey‘-i men yezîd olup on bin akçeye merkūme Emine’nin üzerinde karâr eylemeğin iftirâ eylediği musarrah ve meşrûh olunduğu mezbûr Mustafa Bey mazmûn hücceti inkâr edicek merkūme Emine’den beyyine taleb olundukda Murad Durak b. Abdullah ve Ali Çelebi b. Mahmud nâm kimesneler hâzırân olup fi’l-vâki‘ hudûd-ı mezbûr ile mahdûd olan menzil müteveffâ Arpacı Yusuf’un mülkü olup ba‘de’l-fevt kızı sagīre Kamer’e intikāl edip zarûret-i deyn için mezkûre Emine’ye on bin akçeye sagīre-i mezkûrenin vasîsi olan Üstâd Halil’e bey‘ edip teslîm-i mebî‘ ve kabz-ı semen ettikden sonra târih-i mezbûrda mûmâileyh Sinan Efendi’den hüccet dahi aldım deyu edâ-yı şehâdet ettiklerinden sonra menzil-i mezbûr merkūmenin yedinde ibkā eyleyip mâ vaka‘a bi’t-taleb kayd şud. Şuhûdü’l-hâl: Hasan Reis b. Mehmed, Mustafa b. Mehmed, Maksud Çelebi b. Murad, Ali b. İsa, Muttalib b. Süleyman, Hasan b. Sâdık, Hüseyin b. Behrâm, Mehmed b. Habîb, Mustafa b. Hızır, Musli Çelebi b. Şeyh Sinan, Kâtibü’l-hurûf Kurd ve gayruhüm