Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 605 Hüküm no: 1197 Orijinal metin no: [116b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaya Bey’in, Mahmud b. Ahmed’in katırını zorla değil parayla aldığı Mahrûse-i Üsküdar sükkânından el-Hâc Mahmud b. Ahmed nâm kimesne sâbıkan Kars Beyi olan emîrü’l-ümerâi’l-kirâm Kaya Bey tarafından husûs-ı âti’z-zikri da‘vâya vekîl-i şer‘-i olan işbu bâ‘isü’s-sicil Haydar Bey b. İbrahim mahzarında da‘vâ edip mûmâileyh Kaya Bey Kars’da bey iken benim bir erkek doru katırı cebren aldı hâlâ taleb ederim deyicek ba‘de’s-suâl vekîl-i merkūm müvekkilim müşârunileyh zikr olunan katırı iki bin yüz akçeye mezbûrdan iştirâ edip yirmi altı guruş ve yirmi nakid akçeye cem‘an iki bin yüz akçeyi mûmâileyh Kaya Bey’in kethüdâları Mehmed Kethüdâ yediyle teslîm olunmuşdur deyu cevâb vericek takrîrine muvâfık beyyine taleb olundukda erbâb-ı tîmardan İbrahim Bey b. Mansur ve Hızır b. Ahmed nâm kimesneler li ecli’ş-şehâde hâzırân olup mezbûr Hacı Mahmud’un müşârunileyh bey hazretleri zikr olunan katırını iki bin yüz akçeye iştirâ ettim yirmi altı bin guruş ve yirmi nakid akçe Mehmed Kethüdâ yedinden mezbûr el-Hâc Mehmed’e teslîm olunduğunda biz hâzırlar idik bu husûsa şâhidleriz şehâdet dahi ederiz dediklerinde ba‘de’t-ta‘dîl hayyiz-i kabûlde vâki‘ olup mûcebiyle hükm olundu. Hurrire fî evâsıtı Rebî‘ilevvel sene elf. Şuhûdü’l-hâl: Mustafa b. Mehmed, Şeyh Maksud b. eş-Şeyh Şemseddin Ebvâbî, Mehmed b. Ahmed, Kurd Çelebi b. Mustafa, Mehmed b. Behrâm, Mehmed b. Celil, Mehmed b. Bekir ve Musli Çelebi Sipâhi, Kâtibü’l-hurûf Mustafa