Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 609 Hüküm no: 1208 Orijinal metin no: [118a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraç Ali’nin, Saraç Hızır’ı bıçakla yaraladığı (…) yoldaşlarımızdan Hızır b. Pîr Gāyib nâm (…) mecrûh olmuşdur üzerine varılıp keşf-i ahvâl olunmasın taleb ederim deyicek mahrûse-i mezbûrede eşkiyâ zâbiti olan Dergâh-ı âlî yayabaşılarından Behrâm Subaşı ve mahrûse-i mezkûrede Subaşı Müstedâm Bey ve zeyl-i kitâbda esâmîsi mastûr-ı müslimîn ile mahkeme kâtiblerinden Mevlânâ Mehmed irsâl olunup merkūme Hızır’ın sol küreği altında eser-i cerâhati olup seni kim mecrûh eyledi deyu suâl olundukda yine tâifemizden Sarrâc Ali b. Bâli nâm kimesne hançer ile vurup mecrûh eyledi bu cerâhatim mezbûrun darbındandır da‘vâ ederim deyicek işbu hâzır bi’l-meclis olan merkūm Sarrâc Ali’den bi’l-muvâcehe suâl olundukda inkâr ile cevâb vericek müdde‘î-i mezbûrun da‘vâsına muvâfık beyyine taleb olundukda Bâli b. Hasan ve Ahmed b. Bâli ve Mustafa b. Mehmed ve Mehmed b. Mustafa ve Hızır b. Bâli ve Hüseyin b. Ali ve Hasan b. Bâli nâm harbende ve hân-ı mezkûrûn önünde Nalband Doğmuş b. Hızır nâm kimesneler li ecli’ş-şehâde hâzırûn olup müdde‘î-i mezbûr Hızır Çelebi ile mezbûr Sarrâc Ali kavga edip merkūm Hızır’ı mezkûr Sarrâc Ali sol küreği altından hançer ile vurup mecrûh eyledi deyu şehâdet ettiklerinde gıbbe’t-taleb tahrîr olunduğu mevlânâ-yı müşârunileyh haber verip mezbûr Sarrâc Ali bir hatâdır ettim emir Allah’ındır benim darbımdan mecrûh olmuşdur dediği subaşı talebiyle kayd olundu. Fî evâhiri Zilka‘de sene elf. Şuhûdü’l-hâl: Ahmed b. Hasan, Süleyman b. Davud, Hızır b. Eynehan, Mahmud b. Murad, Ali b. Abdullah, Mustafa b. Mehmed, Mehmed b. Mustafa el-muhzır, Ahmed b. Pîrî er-râcil, Osman b. Abdullah, Hüseyin b. Behrâm, Seyyid Mehmed b. Seyyid Ali