Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 610 Hüküm no: 1209 Orijinal metin no: [118a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Andriye ile Zaharya v. Dimitri’nin ortak koyun alıp sattıkları ve borçlarını ödenme şekli Üsküdar mahallâtına tâbi‘ mahalle-i Ma‘mûre’de sâkin Kosta v. Andriye nâm zimmî mahfil-i şer‘de mahalle-i mezbûrda sâkin Zaharya v. Dimitri mahzarında edâ-yı kelâm edip mezbûr ile müşterek merhûm ve magfûrun-leh Mehmed Ağa hazretlerinin altmış sekiz bin akçelik koyunun alıp bir mikdârı edâ edip kırk sekiz bin akçe deynimiz bâkī kaldıkdan sonra mezbûr koyunun sütün ve kuzusun satıp hâsıl olan akçeyi mezbûr Zaharya ile fahrü’l-emâsil ve’l-a‘yân Pîr Ali Ağa hazretlerinin huzûr-ı şerîflerinde mezbûr Mehmed Ağa’nın câbisi olan Mehmed Çelebi’ye teslîm ederdik lâkin mezbûr Zaharya’da zikr olunan koyunun sütü ve kuzusun bahâsından dört bin yüz elli akçe bâkī kalmışdır ol dahi müşterek olduğumuz hasbiyet ile mâ-beynimizde tansîf olunup iki yüz yetmiş beş akçe bana mezbûr Zaharya dahi bana hak değer deyip mezbûr Zaharya’ya suâl olundukda bende dört bin yüz elli akçe mezbûr koyunun kuzusun ve sütü bahâsından vardır lâkin eğer mezbûr Kosta merkūm câbiye benden ziyâde dört bin yüz elli akçe teslîm eyledi ise iki [yüz] yetmiş beş akçe benim mezbûr Kosta’ya deynim olup mezbûr câbiye ve mûmâileyh ağaya suâl olunsun ona göre ne cevâb ederse râzıyız deyip tarafeynden bu kavl üzre rızâ gösterdiklerin mâ vaka‘a bi’t-taleb kayd. Şuhûdü’l-hâl: Kurd Çelebi el-kâtib, Musli Çelebi, Muttalib [b.] Süleyman, Sefer b. ( ), Mehmed [b.] Behrâm, Mehmed b. Habîb ve gayruhüm