Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 612 Hüküm no: 1217 Orijinal metin no: [119a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Ömer’in âzat olan kölesi Cafer’e, Şeyh Ömer’in borç verdiği altınları oğlunun istediği (…) istintâk olundukda fi’l-vâki‘ ben merkūm Mustafa’nın babası mezkûr Şeyh Ömer’in abd-i müşterâsı idim ve beni yüz otuz sikke kırmızı altın kitâbete dahi kesip kendi hayâtda zikr olunan yüz yirmi kırmızı altın dahi yedine teslîm eyledim deyu cevâb verdikden sonra ıtaknâme ibrâz edip nazar olundukda mazmûnunda mezbûr Cafer merkūm Mustafa’nın babası mezkûr Şeyh Ömer’in abd-i memlûkü olup vech-i meşrûh üzre kitâbete kesilip mâl-ı kitâbeti edâ eylemek ile âzâd olduğu münderic olup lâkin mezbûr Mustafa’nın babası merkūm Şeyh Ömer mezkûr Cafer’e elli kırmızı altın karz verip mezbûr Cafer zikr olan elli kırmızı altını alıp kabz eylediği zikr olan ıtaknâmede münderic olmağın mezbûr Mustafa dahi merkūm Cafer’den mezkûr elli altını taleb eyledikde ânı dahi efendim mezbûr Şeyh Ömer’e verip edâ eyledim deyu cevâb vermeğin edâsına beyyine taleb olunup beyyineden âciz olmağla mezkûr Mustafa’ya zikr olunan elli altını mezbûr Cafer babası mesfûr Şeyh Ömer’e edâ eylediğin bilmediğine merkūm Cafer talebiyle yemîn teklîf olunup yemîn billâh eylemeğin zikr olunan elli altın mezbûr Cafer’den hükm olunup mâ vaka‘a gıbbe’t-taleb ketb olundu. Fî evâili Saferi’l-muzaffer sene elf. Şuhûdü’l-hâl: Şeyh Maksud b. Şemseddin, Musa Çelebi b. Hoca Hasan, Hasan b. Sâdık, Hüseyin b. Behrâm, Mehmed b. Behrâm, Sefer b. Abdullah, havâle şud. Derkenar: Müsveddede kalmamağın bu mahalle yazıldı.