Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 614 Hüküm no: 1220 Orijinal metin no: [119a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Memi Reis b. Abdullah’ın, Malkoç Bey b. Abdullah’ı dövmediği Üsküdar mahallâtından mahalle-i Ma‘mûre’den olup Dergâh-ı âlî yeniçerilerinden Malkoç Bey b. Abdullah tarafından husûs-ı âti’z-zikri da‘vâya vekîl olduğu zevcesi Ayşe bt. Bekir nâm hâtun meclis-i şer‘de işbu bâ‘isü’s-sicil yine mahalle-i mezbûreden Memi Reis b. Abdullah mahzarında da‘vâ edip müvekkilim ve zevcim mezbûr Malkoç Bey nâm kimesneyi gece ile mezbûr Memi Reis darb u let edip elân sâhib-i firâşdır şer‘le görülmesin taleb ederim deyicek vâki‘ hâl mezbûrdan bi’l-muvâcehe suâl olundukda inkâr edip müdde‘î-i mezbûreden da‘vâsına muvâfık beyyine taleb olundukda beyyineden izhâr-ı acz etmeğin merkūma yemîn verildikden sonra mezbûr Memi Reis merkūm Malkoç Bey’in ve benim keyfiyet-i hâlimiz ahâlî-i mahalleden tefahhus olunsun alâ vukū‘ihi muharrer olunsun deyicek ahâlî-i mahalleden olup Dergâh-ı âlî yayabaşılarından Mustafa Subaşı b. Abdülmennân ve Dergâh-ı âlî bevvâblarından fahrü’l-akrân Ahmed Bey b. Abdülmüste‘ân ve Evranos Bey b. Abduddeyyân ve Pîrî Bey b. Abdurrahman b. Receb ve İbrahim Bey b. Kasım el-cündî ve Süleyman Çelebi b. Mürüvvet ve Halil b. Haydar ve Mehmed b. Abdullah ve Sinan b. Abdullah ve el-Hâc Keyvan b. Abdullah ve Ali b. Abdullah ve dahi cemm-i gafîr ve cem‘-i kesîr meclis-i şer‘a hâzırûn olup merkūm reis kendi hâlindedir şürb-i hamr ettiğin ve sarhoşluğun görmedik, iyi adamdır, kemliğini görmedik ammâ merkūm Malkoç Bey fısk ile mukayyeddir aslâ hâlî gezmez ve yine darb u let olunduğu gece sarhoş idi dedikleri kayd olundu. Hurrire fî evâhiri Rebî‘ilevvel sene elf. Şuhûdü’l-hâl: Resûl Efendi b. Mustafa, Abdurrahman b. Pîrî, Veli Dede b. Himmet, Mehmed b. Behrâm, Hüseyin b. Behrâm, Hasan b. Sâdık ve gayruhüm