Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 615 Hüküm no: 1222 Orijinal metin no: [119b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Uğurlu’nun, Mevlânâ Bâli Efendi’nin evini basıp eşya ve parasını gasb ettiği ve Melek Ahmed Paşa’nın parayı ödemesi Bâ‘is-i tahrîr-i kitâb-ı şer‘î ve dâî‘-i tastîr-i hitâb-ı mer‘î oldur ki Emîrü’l-ümerâi’l-kirâm kebîrü’l-küberâi’l-fihâm sâhibü’d-devleti’l-bâhire mâlikü’l-izzeti’z-zâhire zü’l-kadri’l-alî ve’ş-şâni’l-celî tâlib-i rızâ-i Hüdâ Diyarbekir beylerbeyisi olan İbrahim Paşa -yesserehu’r-raûf mâ yeşâ- hazretleri huzûrunda husûs-ı âtînin istimâ‘ı bu dâ‘îlerine fermân olunmağın akd-i meclis olundukdan sonra hâmil-i hâze’l-kitâbü’l-âlî Çemişkezek kazâsından munfasıl olan Mevlânâ Bâli Efendi b. el-Hâc Ali fahrü’l-emâcid ve’l-ekârim câmi‘ü’l-mehâmid ve’l-mekârim vâsık-ı melik-i ahad Melek Ahmed Paşa b. Mehmed hazretleri mahzarında takrîr-i da‘vâ edip mezbûr Melek Ahmed Paşa Musul beylerbeyi oldukda Uğurlu nâm âdemisi müsellem gönderip Çemişkezek’e geldikde benim gelip evim basıp cemî‘ esbâbım ve sepetim içinden otuz beş bin akçem alıp hezâr âlâmdan sonra esbâbım verip akçemi vermedi akçemi mezbûr paşaya vermiş bana vermediler âhirü’l-emr bunda geldikde çavuş ile varıp istedim senin ile bir hâl edelim dedi yine etmedi vezîr-i a‘zâm hazretleri âsitânesine götürdüklerinde varıp yapışıp pâdişâh-ı âlem-penâha kağıd sunarım vezîr-i a‘zâm hazretlerine şikāyet ederim ya akçemi ver ya Uğurlu’yu getiriver deyu ikdâm ettiğimde Müslümanlar yanında senin akçen bana vâsıl olmuşdur şikāyet etme ben sana verip haklaşalım dedi vermedi taleb ederim deyip mezbûr Melek Ahmed Paşa’dan suâl olundukda ben Uğurlu’yu müsellem göndermedim ve akçesin bana vâsıl olmadı ve almadım ve bana vâsıl oldu vereyim demedim deyip müdde‘î-i mezbûrdan beyyine taleb olundukda kazâ-i Yayalardan munfasıl Mevlânâ Şaban Efendi b. Osman ve Küre-i Cedîd kazâsından munfasıl olan Mevlânâ İshak b. Nurullah ve Kutlu Bey Medresesi’nden munfasıl olan Mevlânâ Aydın b. Ümmet nâm kimesneler fi’l-hakīka vezîr-i a‘zâm âsitânesine bile varıp bir fakīrdir paşa hazretleri böyle ağlatma dedikde meblağ-ı mezbûr bana vâsıl olmuşdur ben vereyim hiç şikāyet etme deyu bizim yanımızda ikrâr eyledi şâhidleriz şehâdet ederiz dediklerinde yemîn eylesinler deyip onlar dahi yemîn ettikden sonra ba‘de’t-ta‘dîl şehâdetleri hayyiz-i kabûlde vâki‘ olup meblağ-ı mezbûrun edâsına hükm birle mâ vaka‘a tahrîr olundu. Hurrire fî evâhiri Rebî‘ilevvel sene elf min hicreti’n-nebeviyye. Şuhûdü’l-hâl: Şeyh el-Hâc Mustafa b. el-Hâc Turbâli, Mevlânâ Ahmed b. Abdullah Kadı-i bi Erzurum, Ali Bey b. Hamza, Mahmud Ağa b. Sefer, Derviş Çavuş b. Şaban