Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 640 Hüküm no: 1281 Orijinal metin no: [125a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdar ve tevabi‘indeki asker ölülerinin terekesi için kassam tayini Fezâil-me’âb fevâzıl-nisâb bezm-i zeynî-hâl hazretleri kāmiyâb Tahiyyât-ı tayyibât bi envâ‘i’t-tecelliyât mahfil-i sâmî ve mahall-i kirâmîlerine takdîm olundukdan sonra inhâ-i muhibbâne ve ebnâ-i muhlisâne olunan oldur ki mahrûse-i Üsküdar kazâsı ve muzâfâtından olan mevtâ-yı askeriyenin kısmetini ve sâir rüsûm-ı şer‘iyyesini sizlere tefvîz etmişdir gerektir ki cânib-i şerîfinizden kazâ-i mezbûre muzâfâtına bir kassâm nasb edip irsâl eyleyesiz ki vâki‘ olan mevtâ-yı askeriyenin kısmeti lâzım oldukda muhallefâtın alâ mâ-farazallâhu te‘âlâ kısmet-i âdile ile taksîm edip ellerine sûret-i defter verdikden sonra kānûn üzre âid olan resm-i kısmet ve ıtaknâme ve resm-i vakfiyet ve anınca ve hücceti ve sicillât ve vesâyâ-yı sâir her ne ise kabz ve zabt edip sizlere teslîm eyleye ve muhallefâtı ziyâde ve noksan teslîm etmekden ve kable’l-kısmet resm almaktan ve binde on beşten ziyâde almaktan ve bi’l-cümle kānûn-ı kadîm ve nehc-i müstakimden inhirâf eylemeye ve husûs-ı eytâm-ı müstakil mücelled deftere kayd edip mehâkim-i kuzâta vaz‘ eyleye ki mürûr-ı zamân ve ubûr-ı evân ile zâyi‘ ve teleften masûn ola. Tahrîren fî gurre-i Şa‘bân sene elf. Az‘âfü ibâdü’l-Bârî Ahmed el-Ensârî el-kadı bi Askeri Anadolu