Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 641 Hüküm no: 1283 Orijinal metin no: [125a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Boğdan asıllı kaçak kölenin sahibine teslim edilmesi Budur ki Kırk ikinci bölükde silahdârlar zümresinden olup yevmî on altı akçe ulûfeye mutasarrıf olan Kenan b. Abdullah mahfil-i kazâda Müstedâm Bey mahzarında da‘vâ edip mezbûrun yedinde olan orta boylu, sarı sakallı, Boğdaniyyü’l-asl, Şîrmerd nâm kul benim mülküm olup mülkümden ibâk etmişdir taleb ederim dedikde mezbûr dahi beyân eylesin dedikde udûlden Yusuf b. Abdullah ve Derviş b. Mustafa nâm kimesneler edâ-yı şehâdet-i şer‘iyye edip zikr olunan evsâf ile mevsûfe olan kul mezbûr Kenan’ın mülkü olup mülkünden ibâk etmişdir bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra zikr olunan kulu âhara bey‘ etmeyip ve hibe etmeyip ve bir vechile mülkünden ihrâc etmediğine yemîn verildikden sonra zikr olunan kul mezbûra hükm olunup ve mâ hüve’l-vâki‘ tahrîr olundu. Tahrîren fî evâili Şevvâl sene elf. Şuhûdü’l-hâl: Hasan [b.] Sâdık, Mehmed b. Mustafa er-râcil, Diğer Mustafa b. Abdullah er-râcil, Mehmed Bâşe er-râcil ve gayruhüm