Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 647 Hüküm no: 1302 Orijinal metin no: [126b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Ağa Vakfı’na ait topraklarda üç yıl ziraat yapmayanların men edilip, vakıf arâzilerinin öşürlerinin toplanması Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn huccetü’l-hakkı ale’l-halki ecma‘în vârisü ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-mu‘în Üsküdar kadısı -zîdet fezâiluhû- tevkî‘-i refî‘-i hümâyûn vâsıl olıcak ma‘lûm ola ki dârende-i fermân-ı hümâyûn Mustafa nâm kimesne Südde-i sa‘âdetime gelip taht-ı kazânızda vâki‘ Abdullah Ağa’nın evkāfının bi’l-fi‘l mütevellîsi olup evkāf-ı mezbûreden ba‘zı kimesnelerin tasarruflarında olan yerlerde nice zamân boz ve hâlî koyup kānûn üzre tapuya vermek murâd ettikde sâhibleri hilâf-ı kānûn nizâ‘ ederlermiş buyurdum ki hükm-i şerîfim ile vardıkda onun gibi evkāf-ı mezbûre toprağında yer tasarruf edenlerden tasarruflarında olan yerlerin üç yıl ale’t-tevâlî bilâ mâni‘ boz hâlî koyanlar vech-i meşrûh üzre hâlî kalan yerlerin mütevellîye hükm eyleyesin ki kānûn üzre kime dilerse tapuya vere hilâf-ı şer‘ ve kānûn kimesneye iş ettirmeyesin temerrüdü men‘ edip memnû‘ olmayanları isimleri ile yazıp arz eyleyesin ve arz eylediği defter-i cedîd-i hâkānîde öşr hâsıl kayd olunmuş iken evkāf-ı mezbûre toprağında yer tasarruf edenler öşürlerin vermekde mukāta‘a vermeziz deyu te‘allül ederler imiş onu dahi göresiz şöyle ki defter-i cedîd-i hâkānîde öşr hâsıl kayd olunmuş ise evkāf-ı mezbûre toprağında yer tasarruf edenlerden şer‘le öşürlerin hükm edip alıveresiz hilâf-ı şer‘ ve kānûn ve muğâyir-i hırfet iş ettirmeyesiz şöyle bilesiz ve ba‘de’n-nazar bu hükm-i hümâyûnumu elinde ibkā edip alâmet-i şerîfe i‘timâd kılasız. Tahrîren fî evâsıtı Şa‘bâni’l-mu‘azzam sene elf mine’l-hicreti’n-nebeviyye. Be-makām-ı Kostantıniyye m