Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 656 Hüküm no: 1316 Orijinal metin no: [128b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eğri Oğlu köyü timarının tasarruf edenin ölümü üzerine başka birine verilmesi Meclis-i şerîf-i fezâyil-penâh ve mevkif-i münîf-i efâzıl destgâhlarına da‘avât-ı sâfiye ve tekrîmât-ı vâfiye takdîminden sonra inhâ-i muhlisâ budur ki taht-ı kazâ-i adâlet şi‘ârlarına tâbi‘ Kocaeli sancağında Kandırı nâhiyesinde Eğri Oğlu nâm karye ve gayrıden beş bin iki yüz otuz yedi akçe tîmara mutasarrıf olan Murad fevt olup tîmarı mahlûl olup lâkin defter-i icmâle nazar olundukda âhar üzerinde bulunup tîmar-ı mezbûru Hasan, Murad nâmına tasarruf edip hâlâ mezbûr Hasan ve Murad dahi fevt olup tîmarı mahlûl olmağın Cezâyir’de on bin akçe tîmar emr-i şerîf olan Abdullah oğlu işbu dârende-i hurûf Ahmed tâlib olmağın zikr olan tîmar sene elf Şa‘bâni’l-mu‘azzamı’nın on üçüncü gününden mezbûr Ahmed’e tevcîh olunup berât edince zabt ve tasarruf için tahvîlnâme verilip vardıkda me’mûldür ki tîmar-ı mezbûru târih-i merkūmeden mezbûr Ahmed’e zabt ve tasarruf edip âhardan kimesneyi dahl ettirilmemesine himmet eyleye ve tahvîl ve târihine [düşen rüsûm ve] hukūkdan alınmış nesneleri bulunursa ba‘de’s-sübût hükm edip alıvermesine ihtimâm eyleyesiz bâkī hemîşe ömr ü devlet ve fazl u kudrü ve rif‘at vaz‘ındadır der sancak-ı şerîfde Müstedâm bâd. Tahrîren fî evâsıtı Şa‘bân sene elf. Be-makām-ı Kostantıniyye Yevmü’s-sebt fî 3 Ramazâni’l-mübârek fi’t-târihi’l-mezbûr