Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 43 Hüküm no: 1 Orijinal metin no: [1a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arzuhal eden Mustafa’nın vakıf muytabhane ve bahçenin vâkıfı olan Evliya Mehmed Efendi’nin evladından olduğu Ma‘rûz-ı dâ‘î-i Devlet-i aliyyeleridir ki Sâhib-i arzuhâl Mustafa hasmı olup arzuhâlde mastûr olan mûytâbhâne ve bahçeye vâzı‘u’l-yed olan Mehmed ile murâfa‘a-i şer‘-i şerîf olduklarında zikr olunan mûytâbhâne ve bahçe vakıf olup ecdâdımızdan Evliyâ Mehmed Efendi nâm kimesne vakfiyet ve evlâdiyet üzere mutasarrıflar olup ba‘de vefâtihi mezbûr Mehmed Efendi’nin oğlu olup benim anamın babası olan Mesud Efendi ile mezbûr Mehmed’in anası olan merhûm-ı mezbûr Evliyâ Mehmed Efendi’nin kızı Emetullah li-ebin karındaşlar olup vakfiyet ve evlâdiyet üzere iştirâken mutasarrıflar iken mezbûr Mesud Efendi dahi fevt olup ve mezbûre Emetullah dahi vefât eyledikden sonra mezbûr Mehmed fuzûlî müstakıllen zabt eyledi deyü da‘vâ ve mezbûr Mehmed cevâbında mûytâbhâne ve bahçenin bir mikdârı vakf-ı âhar ve mâ‘adâsı anamdan müntakil mülkümdür deyü vakfiyetini evlâdiyet üzere tasarruflarını inkâr edicek udûl-ı Müslimînden Mehmed Efendi ve Ali ve Ahmed nâm kimesneler fi’l-hakīka zikr olunan mûytâbhâne ve bahçe vakıf olup mezbûr Mustafa’nın anasının babası Mesud Efendi ile mezbûr Mehmed’in anası Emetullah li-ebin karındaşlar oldukları hâlde vakf-ı mezkûrun gallesine ale’l-iştirâki’s-seviyy evlâdiyet üzere tasarruf ederler deyü şehâdet eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ancak mezbûr Mustafa evlâd-ı vâkıfdan olduğunu isbât eylediği huzûr-ı âlîlerine i‘lâm olundu fermân men-lehü’l-emrindir. Fî 12 Recebi’l-ferd sene 1150