Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 44 Hüküm no: 3 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband Ali’nin Süleyman Çavuş’un atını nallarken atın tepmesi sonucu ölümünden at sahibinin sorumlu tutulamayacağı Nalband tâifesinden olup medîne-i Üsküdar’da Solak Sinan mahallesinde sâkin iken bundan akdem vefât eden Ali Bey b. Abdi b. Abdurrahman nâm kimesnenin verâseti zevce-i menkûha-i metrûkesi Hadîce bt. Abdullah nâm hatun ile sulbî sagīr oğlu Osman ve sagīre kızı Âişe’ye münhasıra olduğu şer‘an zâhir oldukdan sonra kendi tarafından asâleten ve sagīrân-ı mezbûrân Osman ve Âişe’nin anaları ve tesviye-i emrlerine kıbel-i şer‘den mansûbe vasîleri olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûr[e] Hadîce vesâyeten meclis-i şer‘-i şerîf-i enverde işbu râfi‘ü’l-kitâb Süleyman Çavuş b. Mustafa nâm kimesne mahzarında üzerine tasvîr-i da‘vâ ve takrîr-i müdde‘â edip mezbûr Süleyman Çavuş târîh-i kitâbdan bir gün mukaddemü’l-asr emlâkinden bir re’s atını nallatmak için müteveffâ-yı mezbûrun dükkânına götürüp mezbûr Ali Bey dahi yedimden ahz u rabt edip mu‘tâd üzere nallar iken zikr olunan at kıç ayağıyla mezbûr Ali Bey’in göğsüne darb edip darb-ı mezkûrdan müteessiren birkaç sâ‘at mürûrunda vefât etmekle mûcib-i şer‘îsini asâleten ve vesâyeten taleb ederim suâl olunsun dedikde müdde‘iyye-i mezbûrenin takrîr-i meşrûh[u] üzere mezbûr Süleyman Çavuş’un husûs-ı mezbûrda sun‘ı olmamağla eylediği da‘vâsı sahîha olmayıp merkūm Süleyman Çavuş’a suâl dahi teveccüh etmemekle mezbûre Hadîce bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Recebi’l-mürecceb li-seneti hamsîn ve mi’ete ve elf. Şuhûdü’l-hâl: Mustafa Efendi el-Mukayyid, Mehmed Efendi b. Ahmed, Hasan Bey b. Ramazan, Mehmed Bey b. Ali, diğer Mustafa Çelebi el-Murtaza, es-Seyyid Süleyman Çelebi b. Ahmed, Osman Bey b. Ahmed, İsa Bey b. Musa.