Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 45 Hüküm no: 4 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın eşi Hasan Beşe’den muhâlaa yoluyla boşandığı Medîne-i Üsküdar’a tâbi‘ Bulgurlu nâm karye sâkinelerinden olup zâtı Ahmed b. Mehmed ve Ali b. Ahmed nâm kimesneler ta‘rîfleriyle mu‘arrefe olan Âişe bt. İlyas nâm hatun meclis-i şer‘-i şerîf-i enverde zevc-i dâhili işbu râfi‘ü’l-kitâb Hasan Beşe b. İbrahim nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Hasan Beşe ile beynimizde hüsn-i mu‘âşeretimiz olmamağla ben hul‘a tâlibe olduğum ecilden zimmetinde mütekarrir ve ma‘kūdun-aleyh olan iki bin akçe mehr-i müeccelimden fâriğa olup nafaka-i iddet-i ma‘lûmem ve me’ûnet-i süknâm dahi kendi üzerime olup ve mezbûrun firâşından hâsıla ve benden mütevellid olan sadriye sagīre kızım Hadîce’yi dahi dokuz yaşını tekmîl edinceye değin kendi mâlımdan infâk ve iksâ etmek üzere zevcim merkūm Hasan Beşe ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘u ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-şehri Recebi’l-ferd li-seneti hamsîn ve mi’ete ve elf. Şuhûdü’l-hâl: Veli Çelebi b. Mehmed, Osman Bey b. ( ), Sarı Mehmed b. Ali, Mustafa Bey b. Ahmed, İsa Bey b. Musa, Hasan Bey b. Ramazan.