Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 48 Hüküm no: 6 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Usta’nın evini Ahmed Çelebi’ye sattığı Zikri âti husûsun mahallinde ketb [ü] tahrîri için savb-ı şer‘-i enverden irsâl olunan Mevlânâ Ahmed Efendi b. el-merhûm Hüseyin medîne-i Üsküdar’a tâbi‘ Çengar (Çengel) karyesine varıp zeyl-i vesîkada muharrerü’l-esâmî [Müslimîn] huzûrlarında akd-i meclis-i şer‘-i şerîf ettikde karye-i mezbûre sâkinlerinden İbrahim Usta b. Durmuş nâm kimesne meclis-i ma‘kūd-ı mezkûrda işbu râfi‘ü’l-vesîka es-Seyyid Ahmed Çelebi b. el-Hâc Ahmed nâm kimesne mahzarında ikrâr-ı kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûrede vâki‘ bir tarafdan Halil ve bir tarafdan Pervene Nasrâniye mülkleri ve iki tarafdan tarîk-i âm ile mahdûd bir bâb fevkānî oda ve tahtında ahır ve kenîf ve bir mikdâr bahçeyi müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz on guruşa mezbûr es-Seyyid Ahmed Çelebi’ye bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm iki yüz on guruşu bi’t-tamâm ve’l-kemâl alıp kabz eyledim ba‘de’l-yevm menzil-i mahdûd-ı mezkûrda benim kat‘â alâka ve medhalim kalmayıp mezbûr es-Seyyid Ahmed Çelebi’nin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî ( ) Recebi’l-ferd li-seneti hamsîn ve mi’ete ve elf. Şuhûdü’l-hâl: Süleyman Ağa b. Osman, Mustafa Beşe b. Ebubekir, Salih Efendi b. Hamza, Mehmed Ağa b. Abdullah, Halil Beşe b. Ahmed.