Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 48 Hüküm no: 7 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın boşadığı karısının yanında bulunan kızı Ayşe için nafaka ödemesi Medîne-i Üsküdar’da Mirâhur mahallesi sâkinelerinden olup zâtı zeyl-i[vesîkada muharrer] Ahmed b. Mehmed ve Ali b. Ahmed nâm kimesneler ta‘rîfleriyle mu‘arrefe olan işbu sâhibetü’l-vesîka Fâtıma bt. Abdullah nâm hatun meclis-i şer‘-i şerîf-i enverde bast-ı kelâm edip gāib ani’l-beled es-Seyyid Ahmed b. Abdullah nâm kimesne zevcim olup bundan akdem beni bâyinen tatlîk etmekle mezbûrun firâşından hâsıla ve benden mütevellide olup hâlâ bi-hakkı’l-hıdâne hacr u terbiyemde olan sadriye kızım sagīre Âişe’nin nafaka ve kisveye eşedd-i ihtiyâcı olmağla babası an-gāib-i mezbûr üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde kaziyye mezbûre Fâtıma’nın beyân ü tafsîl ve ayân eylediği minvâl üzere olduğunu zeyl-i vesîkada <> ve gāib-i merkūm es-Seyyid Ahmed’in nafaka-i mukaddereyi vermeye tahammülü olduğunu [muharrer]ü’l-esâmî Müslimîn ihbârlarıyla lede’ş-şer‘i’l-enverde zâhir oldukdan sonra hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri sagīre-i mezbûrenin babası gāib[-i mezbûr] üzerine külle yevm dokuzar akçe buyurup meblağ-ı mefrûz-i mezkûru ber-vech-i [muharrer] levâzımına harc [ü] sarf için istidâneye, vakt-i zaferde babası gāib-i mezbûr es-Seyyid Ahmed’in üzerine rücû‘a ve Fâtıma Hatun’a kıbel-i şer‘den izin birle mâ hüve’l-vâki‘ bi’t-taleb ketb olundu. Sene 1150 Şuhûdü’l-hâl: es-Seyyid Mehmed Çelebi b. Osman, Osman Bey b. ( ), Mehmed Ağa b. Hüseyin, Hasan Bey b. Ramazan, Veli Ağa b. Mehmed, İsa Bey b. ( )