Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 49 Hüküm no: 8 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Bey’in boşadığı karısının yanında bulunan kızı Zeyneb için nafaka ödemesi Medîne-i Üsküdar’da Reis mahallesinde sâkin ve zâtı İsmail b. Abdullah ve Mehmed b. Ahmed nâm kimesneler ta‘rîfleriyle mu‘arrefe olan işbu râfi‘atü’l-vesîka Rukiye bt. Mehmed nâm hatun meclis-i şer‘-i hatîrde zevc-i sâbıkı Osman Bey b. Abdünnebi nâm kimesne mahzarında bast-ı kelâm ve ifâde-i merâm edip mezbûr Osman bundan akdem zevcim iken beynimizde hüsn-i mu‘âşeretimiz olmamağla ben hul‘a tâlibe olup mehr-i müeccelimden ve nafaka-i iddet ve me’ûnet-i süknam üzerlerine ve mezbûrun firâşından hâsıla bi-hakkı’l-hıdâne hâlâ hacr u terbiyemde olan sagīre kızım Zeyneb’i dahi dokuz yaşına değin mâlımdan infâk ve iksâ etmek üzere mezbûr Osman Bey ile muhâla‘a olmuşidim lâkin ben hâlâ mu‘sire ve fakīre olduğum ecilden sagīre-i mezbûreyi infâka kudretimiz olmayıp ve sagīre-i mezbûrenin dahi mâlı olmamağla sagīre-i mezbûrenin nafakaya eşedd-i ihtiyâcı olmağın sagīre-i mezbûrenin nafakasi’çün babası mezbûr üzerine kıbel-i şer‘den kadr-ı kifâye meblağ farz ve takdîr olunmak bi’l-hıdâne matlûbumdur dedikde fi’l-hakīka hâl mezbûre Rukiye’nin takrîr-i meşrûhu üzere olduğu zeyl-i vesîkada muharrerü’l-esâmî Müslimîn ihbârlarıyla zâhir olduğundan mâ‘adâ merkūm Osman Bey dahi ikrâr ve i‘tirâf etmekle hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri dahi ber-vech-i muharrer <> sagīre-i mezbûre için takrîr-i nafaka olunmak meşrû‘ olduğu kütüb-i mu‘teberâtda mastûr olmağla târîh-i kitâbdan külle yevm babası merkūm üzerine altışar akçe takdîr edip <> sagīre-i mezbûreye harc [ü] sarfa ve lede’l-hâce istidâneye [ve] hîn-i zaferde babası Osman Bey üzerine rücû‘a mezbûre Rukiye Hatun’a izin vermeğin mâ hüve’l-vâki‘ bi’t-taleb ketb olundu. Sene 1150 Şuhûdü’l-hâl: Mustafa Bey b. Ramazan, Osman Bey b. ( ), Veli Bey b. Mehmed, Hasan Bey b. Ramazan, İsa Bey b. Musa.