Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 50 Hüküm no: 10 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Feyzullah’ın evlendiği Gürcü asıllı Hatice’nin cariyelikten azat edilip hür olduğu anlaşıldığından Emetullah Hanım’ın açtığı davaya itibar edilmediği Medîne-i Üsküdar’da Toygar Hamza mahallesi sâkinelerinden olup zâtı el-Hâc İsmail b. el-Hâc Ali ve Ahmed b. Hüseyin nâm kimesneler ta‘rîfleriyle mu‘arrefe olan Emetullah bt. Receb nâm hatun meclis-i şer‘-i şerîf-i enverde yine mahalle-i mezbûre sâkinelerinden olup orta boylu açık kaşlı kara gözlü Gürciyyetü’l-asl işbu râfi‘atü’l-vesîka Hadîce bt. Abdullah b. Abdülmennan Hatun tarafından ber-vech-i âti vekîl olduğu zât-ı mezbûreyi bi’l-ma‘rifeti’ş-şer‘iyye ârifân yine şâhidân-ı mezbûrân el-Hâc İsmail ve Ahmed ta‘rîfleriyle mu‘arrefe olan müvekkilem mezbûrenin zevci el-Hâc Mustafa b. Feyzullah nâm kimesne mahzarında üzerine da‘vâ ve takrîr-i kelâm edip mevsûfe-i mezbûre Hadîce benim câriye-i memlûkem olup mezbûr el-Hâc Mustafa benim iznim yoğiken kendüye tezvîc ve nikâh etmeğin suâl olunup câriye-i memlûkemi bana teslîme tenbîh olunması matlûbumdur dedikde gıbbe’s-suâl vekîl-i mezbûr el-Hâc Mustafa cevâbında fi’l-hakīka müvekkile-i mezbûre Hadîce’yi ber-vech-i muharrer kendüye tezvîc ve nikâh eylediğini ikrâr lâkin müdde‘iyye-i mezbûre Emetullah târîh-i kitâbdan üç ay mukaddem mevsûfe-i mezbûre Hadîce’yi cemî‘ mâlından tahrîr ve i‘tâk ve sâir harâir-i asliyât zümresine ilhâk ve idrâc edip ol vechile mezbûre Hadîce hürre olmağla tezvîc ve nikâh eyledim deyü def‘ ile mukābele edicek akībe’l-istintâk ve’l-inkâr vekîl-i mezbûr el-Hâc Mustafa’dan müdde‘âsına mübeyyine beyyine taleb olundukda udûl-ı ahrâr-ı ricâl-i Müslimînden olup Selman Ağa mahallesi sâkinlerinden Berber Mehmed Çelebi b. Ahmed ve el-Hâc Ali b. Muharrem nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘âsını mezbûre Emetullah mevsûfe-i mezbûre Hadîce’yi târîh-i kitâbdan üç ay mukaddem bizim huzûrumuzda cemî‘ mâlından tahrîr ü i‘tâk ve harâir-i asliyât zümresine ilhâk u idrâc edip ol vechile mezbûre Hadîce hürre olmuşdur mezbûre Emetullah mu‘ârazadan men‘ olunmağın mâ hüve’l-vâki‘ bi’t-taleb ketb olundu. Min-Recebi’l-ferd li-seneti hamsîn ve mi’ete ve elf. Şuhûdü’l-hâl: el-Hâc İsmail b. el-Hâc Ali, Veli Ağa b. Mehmed, Hasan Bey b. Ramazan, Süleyman Efendi b. ( ).