Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 51 Hüküm no: 11 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe ve eşi Ayşe’nin ortak evlerini Halil Bey’e sattıkları Medîne-i Üsküdar’da Turbâli mahallesi sâkinlerinden İbrahim Beşe b. Hasan ve zevcesi Âişe bt. Ali nâm zevcân meclis-i şer‘-i şerîf-i enverde işbu sâhibü’l-vesîka Halil Bey b. Abdullah nâm kimesne mahzarında her biri ikrâr ve takrîr-i kelâm edip akd-i âti’z-zikrin sudûruna değin ale’l-iştirâki’s-seviyy silk-i mülkümüzde münselik emlâkimizden olup mahalle-i mezbûrede vâki‘ bir tarafdan Gürcü Hasan bahçesi ve bir tarafdan Çadırcı İbrahim mülkü ve iki tarafdan tarîk-i âm ile mahdûd bir bâb fevkānî oda ve bir tahta-pûş ve bir sofa ve üç bâb tahtânî oda ve bir sarnıç ve bir mikdâr bahçeyi müştemil bir bâb mülk [4b] menzilimizi tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz kırk bir guruşa merkūm Halil Bey’e bey‘ ü temlîk ve teslîm eylediğimizde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı merkūm yüz kırk bir guruşu mezbûr Halil Bey yedinden bi’t-tamâm ve’l-kemâl ahz u kabz eyledik ba‘de’l-yevm zikri mürûr eden menzil-i mahdûd-ı mezkûrda bizim kat‘an alâka ve medhalimiz kalmayıp mezbûr Halil Bey’in mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dediğimizde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: el-Hâc Hüseyin b. Mahmud, Ömer Beşe b. Ahmed, Molla Ali b. Ali, Baba Ali b. Ali, Münâdî el-Hâc Hüseyin b. Münâdî Ebubekir.