Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 52 Hüküm no: 12 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in boşandığı eşi Ayşe Hanım’ın yanında bulunan küçük oğlu için nafaka ödemesi Medîne-i Üsküdar’da Selmanağa mahallesinde sâkine ve zâtı Mustafa Bey b. Ahmed ve Osman b. Ali nâm kimesneler ta‘rîfleriyle mu‘arrefe olan işbu râfi‘atü’l-vesîka Âişe bt. Mehmed nâm hatun meclis-i şer‘-i hatîrde zevc-i sâbıkı Mustafa b. Ahmed nâm kimesne mahzarında bast-ı kelâm [ve] ifâde-i merâm edip zevcim merkūm Mustafa târîh-i kitâbdan bir gün mukaddem beni talâk-ı selâse ile tatlîk etmekle mezbûrun firâşından hâsıl ve benden mütevellid olup hâlâ bi-hakkı’l-hıdâne hacr u terbiyemde olan sadrî sagīr oğlum Ahmed’in nafaka ve kisveye eşedd-i ihtiyâcı olmağın babası merkūm üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur bi’l-hıdâne dedikde hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri dahi târîh-i kitâbdan külle yevm babası merkūm üzerine altışar akçe nafaka ve kisve-bahâ farz ve takdîr edip meblağ-ı mefrûz-ı mezkûru ber-vech-i muharrer sagīr-i mezbûra harc ü sarfa ve lede’l-hâce istidâneye ve hîn-i zaferde babası merkūm Mustafa üzerine rücû‘a mezbûre Âişe Hatun’a izin birle mâ hüve’l-vâki‘ bi’t-taleb ketb olundu. Min-Recebi’l-ferd li-seneti hamsîn ve mi’ete ve elf. Şuhûdü’l-hâl: Mehmed Efendi b. Mehmed Efendi, el-Hâc Ahmed b. Mehmed, İmâm Ali Efendi b. ( ), el-Hâc Mustafa b. Musa, Veli Bey b. Mehmed.