Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 53 Hüküm no: 14 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayserili Hurik’in köyünde bulunan bağını Abraham’a sattığı Fi’l-asl vilâyet-i Anadolu’da medîne-i Kayseriye kazâsına tâbi‘ Venk karyesinde sâkin olup mahrûse-i Galata’da Beyoğlu kurbünde Ağa mahallesinde sâkin Horik v. Haçik nâm zimmî medîne-i Üsküdar’da meclis-i şer‘-i şerîf-i enverde işbu râfi‘ü’s-sifr Abraham v. Haçador nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan Simo zimmî bağı ve bir tarafdan Bogos zimmî bağı ve bir tarafdan benim âhar bağım ve bir tarafdan tarîk-i âm ile mahdûd tahmînen iki ırgatlık bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi guruşa mesfûr Abraham zimmîye bey‘ ü temlîk, mahallinde kabza taslît eylediğimde ol dahi ber-vech-i muharrer iştirâ ve temlîk ve kabûl eyledikden sonra semeni olan meblağ-ı merkūm yirmi guruşu mesfûr Abraham zimmî yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden bağ-ı mahdûd-ı mezkûrda benim kat‘â alâka ve medhalim kalmayıp mesfûr Abraham zimmînin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-şehri Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Veli Ağa b. Mehmed, Mustafa Bey b. Ahmed, Hasan Bey b. Ramazan, İsa Bey b. Musa, Mehmed Bey b. ( ).