Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 53 Hüküm no: 15 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parasko v. Yakon’un Pendik’te bulunan bağını Mustafa Odabaşı’na sattığı Medîne-i Üsküdar’a müzâfe Adalar nâhiyesine tâbi‘ Pendik nâm karye sâkinlerinden Parasko v. Yakon nâm zimmî meclis-i şer‘-i şerîf-i enverde işbu sâhibü’l-vesîka Mustafa Odabaşı b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûrede vâki‘ bir tarafdan el-Hâc Ahmedoğlu bağı ve bir tarafdan dere ve bir tarafdan tarîk-i âm ile mahdûd Kaplan bağı demekle ma‘rûf tahmînen üç bin çubuk mikdârı bir kıt‘a kürûmu mülk bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile altmış guruşa mezbûr Mustafa Odabaşı’ya bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra meblağ-ı merkūm altmış guruşu merkūm Mustafa Odabaşı yedinden bi’t-tamâm ve’l-kemâl ahz [u] kabz eyledim ba‘de’l-yevm zikri mürûr eden bağ-ı mahdûd-ı mezkûrede benim kat‘â alâka ve medhalim kalmayıp mezkûr Mustafa Odabaşı’nın mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Dolayobalı ( ) b. Abdullah, Arpacı Abdullah Beşe b. Ahmed, Mustafa Beşe b. Resul, Veli Bey b. Mehmed.