Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 54 Hüküm no: 16 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma Hanım’ın oğlu Fethullah’ın kendine miras kalan iki sehm menzil hissesini Ahmed Ağa’ya sattığı Medîne-i Üsküdar’da Câmi‘-i Kebîr mahallesi sâkin[e]lerinden iken bundan akdem fevt olan Fâtıma bt. Hasan b. Abdullah nâm hatunun verâseti sadrî kebîr oğulları Feyzullah ve Fethullah ve Nurullah ve kebîre kızı Âişe ibnâ ( ) nâm kimesnelere münhasıra ve tashih-i meselesi yedi sehmden i‘tibâr olunup sihâm-ı mezbûreden ikişer sehmi oğulları mezbûrûndan her birine ve bir sehmi kızı mezbûre Âişe’ye isâbeti tahakkukundan sonra mezbûr Fethullah meclis-i şer‘-i hatîrde işbu râfi‘ü’l-kitâb Ahmed Ağa b. Abdullah nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Latif Çelebi mülkü ve bir tarafdan Arab Fâtıma mülkü ve bir tarafdan ba‘zan Selîme Hatun mülkü ve iki tarafdan tarîk-i âm ile mahdûd bir bâb mülk menzil anamız müteveffât-ı mezbûrenin ile’l-vefât mülkü olup ba‘de vefâtihâ tashih-i merkūm üzere bizlere bi’l-ırsi’ş-şer‘î intikāl etmiş idi el-hâletü hâzihi menzil-i mahdûd-ı mezkûrdan benim iki sehm hisse-i irsiyem mukābelesinde mezbûr Latifullah [Latif] Çelebi tarfilerin [tarafında] vâki‘ fevkānî bir sofa ve dehliz ve tahtâni bir bâb oda ve bir mikdâr bahçeyi müştemil mahallini ifrâz ve alâmet-i fâsıla vaz‘ olundukdan sonra mârrü’z-zikr müfrez hisse-i irsiyemi mezbûr Ahmed Ağa’ya yüz seksen guruşa bey‘ ü temlîk ve teslîm eyledikden sonra semeni olan meblağ-ı merkūm yüz seksen guruşu yedinden tamâmen ahz [u] kabz eyledim fî-mâ ba‘d menzil-i mahdûd-ı mezkûrdan müfrez olan iki sehm hisse-i irsiyemde benim kat‘â alâka ve medhalim kalmayıp merkūm Ahmed Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun <> dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Ali Çelebi b. Mehmed, diğer Halil Ağa b. Ahmed, Halil Ağa b. Hasan, Molla Mehmed b. Ahmed, Veli Ağa [b.] Molla Mehmed.