Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 55 Hüküm no: 17 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın uhdesinde bulunan evi ile bazı eşyalarını kızı Safiye’ye satması hakkında terkin edilmiş kayıt <Toygar Hamza>> Turbâli mahallesi sâkinelerinden olup zâtı Ali Beşe b. Ahmed ve Mehmed Beşe b. Mehmed nâm kimesneler ta‘rîfleriyle mu‘arrefe olan Âişe bt. Ali nâm hatun meclis-i şer‘-i şerîf-i enverde kebîre kızı işbu sâhibetü’l-vesîka Safiye bt. el-Hâc Yusuf nâm hatun mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup <> medîne-i mezbûrede Solak Sinan mahallesinde vâki‘ bir tarafdan imâma meşrûta <> menzil[i] ve bir tarafdan Ahmed Ağa mülkü ve bir tarafdan Rukiye Hatun mülkü ve bir kebîr matbah ve bir tarafdan tarîk-i âm ile mahdûd iki bâb fevkānî oda ve bir sofa ve bir matbah ve bir mikdâr avlu[yu] müştemil mülk menzilim ile yine eşyâ-i memlûkemden bir çift zümrüd küpe ve on sahan ve beş kapak ve dört tencere ve bir sini bir sagīr sini ve bir leğen ma‘a ibrik ve bir tâbe-i dest ve bir tas ve bir hamam tası ve iki kahve tebsi[si] ve bir güğüm ve on yastık ve iki baş yasdığı ve beş minder ve üç yan keçesi ve bir orta keçesi ve üç döşek ve yedi yorgan ve bir kefkir ma‘a kefçe ve iki kahve ibriği tarafeynden îcâb ve kabûlü hâvî bey‘-i bâtt-ı sahîh-i şer‘î ile kızım mezbûre Safiye’ye yüz guruşa bi-safkatin vâhidetin bey‘ ü temlîk ve teslîm eylediğimden sonra ol dahi ber-vech-i muharrer iştirâ ve temellük ve tesellüm [6a] eyledikden sonra semeni olan meblağ-ı merkūm yüz guruşun otuz guruşunu mukaddemâ kızım mezbûre yedinden istikrâz ve kabz [ve] istihlâk eylediğim otuz guruş deynime mahsûb ve takas eylediğimde ol dahi mukāssa ve kabûl eyledikden sonra bâkī kalan meblağ-ı merkūm yetmiş guruş mutâlebesinden kızım mezbûre Safiye’nin zimmetini ibrâ ve iskāt eyledim fî-mâ ba‘d menzil-i mahdûd-ı mezkûr ve eşyâ-i muharrere-i mezkûre kızım mezbûrenin mülk-i müşterâsı olup benim kat‘â alâka ve medhalim kalmadı keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Sarrâcbaşı el-Hâc Mehmed Ağa b. ( ), Takyeci Hasan Ağa b. ( ), Ali Beşe b. Ahmed, Yahya Beşe b. Ahmed, Mustafa b. Şa‘bân.>>