Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 55 Hüküm no: 18 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hanım’ın vefat eden kocasından intikal eden terekeden bazı malları gizlemediğine dair yemin ettiği Medîne-i Üsküdar’da Selami mahallesinde sâkin iken bundan akdem Özi Kal‘ası’nda fevt olan İbrahim b. Mehmed b. Abdullah’ın verâseti zevce-i menkûha-i metrûkesi İsmihan bt. Hasan nâm hatun ile li-ebeveyn kız karındaşı Fâtıma nâm hatuna ve li-ebeveyn ammisi Mehmed b. el-mezbûr Abdullah’a münhasıra ve tashîh-i meselesi dört sehmden olup sihâm-ı mezbûreden bir sehmi zevcesi mezbûreye ve iki sehmi kız karındaşı mezbûreye ve bir sehmi ammisi mezbûra isâbeti tahakkukundan sonra zâtı vech-i şer‘î üzere mu‘arrefe olan [tereke-i] mezbûra vâzı‘atü’l-yed olan işbu râfi‘atü’l-vesîka mezbûre İsmihan muvâcehesinde her biri üzerine da‘vâ ve takrîr-i kelâm edip mûrisimiz müteveffâ-yı mezbûrun ber-mûceb-i defter-i müfredât tereke-i ma‘lûmesini her birimiz bi-kadri’l-hısâs beynimizde iktisâm edip lâkin mezbûre İsmihan müteveffâ-yı merkūmun terekesinden hâric ez defter on beş aded altın ve yedi aded cedîd guruşu ketm ü ihfâ etmekle meblağ-ı merkūmu tashîh-i mezkûr üzere hissemize âid olan meblağı taleb ederiz suâl olunsun dediklerinde gıbbe’s-suâl ve akībe’l-inkâr müdde‘iyyân-ı mezbûrandan müdde‘âlarına mübeyyine beyyine taleb olundukda ityân-ı beyyineden izhâr-ı acz ile istihlâf etmeleriyle mezbûre İsmihan zevci müteveffâ-yı mezbûrun terekesinden on beş aded altın ve yedi aded cedîd guruş ketm ü ihfâ etmediğine yemîn teklîf olundukda ol dahi alâ-vefki’l-mes’ûl half billâhi’l-aliyyi’l-a‘lâ etmeğin mûcebince müdde‘iyyân-ı mezbûrân Fâtıma ve Mehmed bilâ-beyyine bî-vech mu‘ârazadan [men‘] olunup mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-seneti hamsîn ve mi’ete ve elf. Şuhûdü’l-hâl: Halil Ağa b. Hasan, Memiş Beşe b. ( ), Çukadâr Halil b. ( ), Veli Bey b. Mehmed, Mustafa Bey b. Ahmed, İsa Bey b. Musa, Hasan Bey b. Ramazan, Mehmed Bey b. ( ), Ali Bey b. ( ), Hasan Bey b. ( )